មហន្តរាយព្រៃឈេីដ៏ធំកំពុងកើតមានឡេីងនៅតំបន់ដែនជម្រកសត្វព្រៃ ព្រៃឡង់ ខេត្តស្ទឹងត្រែង
(ខេត្ដស្ទឹងត្រែង)៖ រូបភាពអំពីការកាប់បំផ្លាញព្រៃឈើថ្មីៗនេះ ស្ថិតនៅតំបន់ដែនជម្រកសត្វព្រៃ ព្រៃឡង់ ស្ថិតនៅក្នុងភូមិសាស្រ្តភូមិទាល់ ឃុំអន្លង់ភេ ស្រុកថាឡាបរិវ៉ាត់ គ្រប់គ្រងដោយមន្ទីរបរិស្ថាន ខេត្តស្ទឹងត្រែងគឺបានបង្ហាញអំពីមហន្តរាយថ្មីទៀតនៃការកាប់បំផ្លាញព្រៃឈើ។ ក្រុមស្នាដៃក្រុមឧក្រិដ្ឋជនបំផ្លាញព្រៃឈើដែលអាចជាអ្នកមានខ្នងបង្អែកក្រាស់ៗ និងជាបុគ្គលដែលមានឥទ្ធិពលទេីបមិនមានមន្ដ្រីរូបណាហ៊ានចាត់វិធានការ។
រូបថតនៃការកាប់ផ្តួលរំលំដេីមឈេីធំ២ជាច្រើនដេីមត្រូវថតបានកាលថ្ងៃទី២៩ ខែមករា ឆ្នាំ២០២៥នេះ បង្ហាញឱ្យឃើញអំពីគល់ឈើ និងឈើដែលក្រុមឧក្រិដ្ឋជនបំផ្លាញព្រៃឈើ ទើបអារផ្ដួលថ្មីៗនៅតំបន់ដែនជម្រកសត្វព្រៃ ព្រៃឡង់ដែលគេដឹងថា ស្ថិតនៅក្នុងដែនសមត្ថកិច្ចរបស់មន្ទីរបរិស្ថាន ខេត្តស្ទឹងត្រែង គ្រប់គ្រងដោយលោកស្រេង ជាហេង ជាប្រធាន។
បើតាមប្រភពបានរាយការណ៍ថា សកម្មភាពអារឈើបែបអនាធិបតេយ្យនៅត្រង់ចំណុចភូមិសាស្រ្តភូមិទាល់ ឃុំអន្លង់ភេ ស្រុកថាឡាបរិវ៉ាត់ ខេត្តស្ទឹងត្រែង ក្នុងដែនជម្រកសត្វព្រៃ ព្រៃឡង់ដោយមិនមានការទប់ស្កាត់ពីមន្ត្រីបរិស្ថាននោះឡើយ។ ភាពស្ងៀមស្ងាត់របស់ស្ថាប័នជំនាញទាំងនេះនាំឱ្យមានមន្ទិលសង្ស័យថា អាចមានអាថ៌កំបាំងនៅពីក្រោយរវាងមន្ត្រីបរិស្ថានប្រចាំការនៅតំបន់នោះជាមួយនឹងក្រុមកាប់ឈើ។ បើតាមប្រភពរាយការណ៍ថា ការកាប់ឈើទាំងនោះមានទំហំធំដែលបង្កឱ្យមានមហន្ដរាយយ៉ាងខ្លាំងដល់ធនធានធម្មជាតិដែលជាកត្ដាធ្វើឱ្យបាត់បង់លំនឹងផែនដី ការបម្រែបម្រួលអាកាសធាតុ និងតុល្យភាពកាបូនជាដេីម។
ប្រភពពីប្រជាពលរដ្ឋបានរិះគន់តៗគ្នា និងអ្នកសារព័ត៌មានកន្លងមកដែលបានផ្សព្វផ្សាយបង្ហាញអត្តសញ្ញាណក្រុមឧក្រិដ្ឋជនបំផ្លាញព្រៃឈើក៏ប៉ុន្តែមន្ត្រីជំនាញបរិស្ថានតែងតែឆ្លើយថាមិនបានដឹងដោយសំអាងថា មិនបានឃើញ និងមិនបានទៅដល់។
តើហេតុអ្វីបានជាក្រុមឧក្រិដ្ឋជនបំផ្លាញព្រៃឈើនោះអាចចូលទៅកាប់បំផ្លាញដើមឈើធំៗ នៅក្នុងដែនជម្រកសត្វព្រៃ ព្រៃឡង់បាន? ករណីនេះ សមត្ថកិច្ចជំនាញពាក់ព័ន្ធមានតួនាទីបង្ក្រាបក៏ត្រូវបើកស៊ើបអង្កេត ស្រាវជ្រាវ នូវតម្រុយនេះដេីម្បីទប់ស្កាត់ និងការពារ ធនធានធម្មជាតិ សត្វព្រៃដែលកំពុងរងនូវការបំផ្លាញបាត់បង់ដោយក្រុមឧក្រិដ្ឋជនដើម្បីរក្សាបានជាឧត្ដមប្រយោជន៍ជាតិជាធំ។
ក្រោយពីបែកធ្លាយរូបភាពគល់ឈើជាច្រើន និងឈើដែលក្រុមឧក្រិដ្ឋជនអារផ្ដួលរំលំដែលមានមុខកាត់ធំៗ ត្រូវបានគេបង្ហោះនៅតាមបណ្ដាញសង្គមព្រោងព្រាតមកទល់ថ្ងៃទី៣០ ខែមករា ឆ្នាំ២០២៥ គេសង្កេតឃើញលោក ស្រេង ជាហេង ប្រធានមន្ទីរបរិស្ថានខេត្តបានដឹកនាំក្រុមការងារកម្លាំងចម្រុះចុះត្រួតពិនិត្យទីតាំងការកាត់រលំ អាជ្រៀកឈើនៅចំណុចនិយាមការ 569752-1488530 ស្ថិតក្នុងដែនជម្រកសត្វព្រៃ ព្រៃឡង់ ភូមិសាស្រ្តភូមិទាល់ ឃុំអន្លង់ភេ ស្រុកថាឡាបរិវ៉ាត់ ខេត្តស្ទឹងត្រែងដែលគ្រប់គ្រងដោយលោកទូច វិចិត្រ នាយកដែនជម្រកសត្វព្រៃ ព្រៃឡង់ ដើម្បីចាត់វិធានការបង្ក្រាបប៉ុន្តែក្រុមឧក្រិដ្ធជនហាក់ដឹងខ្លួនមុន ឬប្រហែលមានអ្នករាយការណ៍ប្រាប់មុនទើបពួកគេនាំគ្នាបើកគេចចេញមកក្រៅអស់យ៉ាងសុវត្ថិភាពខណៈសមត្ថកិច្ច អាជ្ញាធរជំនាញពាក់ព័ន្ធឱ្យសម្រាកបណ្តោះអាសន្នចៀសវាងបែកការណ៍។
ចំណុចនេះហើយទើបលោក ស្រេង ជាហេង ប្រធានមន្ទីរបរិស្ថានខេត្ត និងក្រុមការងារកម្លាំងចម្រុះចុះមកបានត្រឹមតែត្រួតពិនិត្យមើល និងរាប់គល់ឈើឃើញថា មានចំនួន៥៦គល់ក្នុងនោះគល់ឈើអាររំលំថ្មីមានចំនួន៤៩គល់ និងគល់ឈើអារចាស់មានចំនួន ៧គល់ ជាប្រភេទឈើ ឈើទាល ដែលក្រុមឧក្រិដ្ធជនមិនអាចគាស់យកទៅបានទើបបន្សល់ទុកនៅទីនោះ។
ករណីនេះលោក ស្រេង ជាហេង ប្រធានមន្ទីរបរិស្ថានខេត្តថា មន្ត្រីជំនាញកំពុងរៀបចំកសាងសំណុំរឿងបញ្ជូនទៅតុលាការ និងបន្តសហការជាមួយអាជ្ញាធរភូមិ-ឃុំស្រាវជ្រាវរកជនដែលបានប្រព្រឹត្តដើម្បីចាត់ការតាមនិតិវិធី។
