សាខាកាកបាទក្រហមខេត្តកំពង់ចាមបានសាងសង់ផ្ទះមនុស្សធម៌ចំនួន ២២ខ្នងផ្តល់ជូនទុគ៌តជន និងជនងាយរងគ្រោះចាប់ពីឆ្នាំ ២០២១-២០២៤

(កំពង់ចាម)៖ សាខាកាកបាទក្រហមកម្ពុជា ខេត្តកំពង់ចាម នៅរសៀលថ្ងៃទី១៩ ខែធ្នូ ឆ្នាំ២០២៤ នេះ នៅសាលប្រជុំធំ សាលាខេត្ត បានសហការរៀបចំកិច្ចប្រជុំបូកសរុបលទ្ធផលការងារសាងសង់ផ្ទះមនុស្សធម៌ ខេត្តកំពង់ចាមឆ្នាំ ២០២១-២០២៤ ក្រោមអធិបតីភាពឯកឧត្តម អ៊ុន ចាន់ដា ប្រធានគណៈកម្មាធិការសាខា និងនិមន្តអញ្ជើញចូលរួមនាឱកាសនោះមានព្រះសីលសំវរ ប៊ត តាំងឆេង ព្រះនាគមុនី ព្រះមេគណខេត្ត ព្រះចៅអធិការ ព្រះអនុគណក្រុង ស្រុក គណ:ធម្ម យុត្តិកនិកាយ ព្រះមន្ត្រីសង្ឃជាសមាជិកភាពមូលនិធិនៃកម្មវិធីផ្ទះមនុស្សធម៌ខេត្ត និងលោក-លោកស្រី តំណាងមន្ទីរអង្គភាពប្រមាណជា ១៦២អង្គ/នាក់ ។

ក្នុងរបាយការណ៍ស្វាគមន៍ ឯកឧត្តម ស្រី សុភ័ក្ត្រ លេខាធិការសាខា និងជាប្រធានក្រុមការងារប្រតិបត្តិ និងវាយតម្លៃនៃកម្មវិធីផ្តល់ផ្ទះមនុស្សធម៌ខេត្តបានបញ្ជាក់ថា កម្មវិធីផ្តល់ផ្ទះមនុស្សធម៌នេះជាកម្មវិធីថ្មីតែជាសកម្មភាពចាស់បានបង្កើតឡើងស្ថិតក្រោមការ ដឹកនាំរបស់គណៈកម្មាធិការសាខា សហការ ជាមួយសាលាគណខេត្តតាមសេចក្តីសម្រេចលេខ ០០៥ សស.កក្រក.កច ចុះថ្ងៃទី០១ ខែធ្នូ ឆ្នាំ ២០២០ ក្នុងគោលបំណងជួយសាងសង់ និងផ្តល់ផ្ទះជាអំណោយមហាសាលជូនដល់ទុគ៌តជន និងជនងាយរងគ្រោះទាំងឡាយណាដែលលំបាកខ្វះខាត ហើយត្រូវការជម្រកសម្រាប់ស្នាក់នៅពិតប្រាកដដោយមិនរើសអើង មិនប្រកាន់សាសនា ឬនិន្នាការនយោបាយអ្វីឡើយ។

កម្មវិធីនេះមានក្រុមការងារ ២ជាសេនាធិការ ក្នុងនោះ ១ក្រុមជាក្រុមការងារប្រតិបត្តិ និងវាយតម្លៃដឹកនាំដោយឯកឧត្តម ស្រី សុភ័ក្ត្រ លេខាធិការសាខាសាខា មានអនុប្រធាន និងសមាជិក ១៣អង្គ/នាក់ និង ១ក្រុមទៀតជាក្រុមការងារកៀរគរ និងគ្រប់គ្រងមូលនិធិ ដឹកនាំដោយព្រះសីលសំវរ ប៊ត តាំងឆេង ព្រះនាគមុនី ព្រះមេគណខេត្តមានព្រះអនុប្រធាន និងសមាជិកសរុបចំនួន ៤៨ អង្គ/នាក់។

ឯកឧត្តម ស្រី សុភ័ក្ត្រ ឱ្យដឹងទៀតថា គិតចាប់ពីខែមីនា ឆ្នាំ២០២១ ដល់ខែធ្នូ ឆ្នាំ ២០២៤ នេះ កម្មវិធីបានសម្រេចសាងសង់ និងប្រគល់ផ្ទះមនុស្សធម៌បាន ២២ខ្នង បង្គន់អនាម័យ ២បន្ទប់ និងអណ្តូងទឹកស្អាត ១កន្លែង ក្នុងនេះអំណោយសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ចំនួន ១ខ្នង អំណោយសាខាផ្ទាល់ ១ខ្នង អំណោយសប្បុរសជន ៣ខ្នង និង១៧ខ្នងទៀតជាការចូលរួមបដិភាគពីឯកឧត្តម អ៊ុន ចាន់ដា -ព្រះសីលសំវរ ប៊ត តាំងឆេង ព្រះមេគណខេត្ត សប្បុរសជន និងក្រុមការងារកៀរគរ និង គ្រប់គ្រងមូលនិធិខេត្ត។ ក្នុង ២២ខ្នងផ្ទះនេះ សាខាបានសម្រេចផ្តល់ជូនចាស់ជរាគ្មានទីពឹង ១១គ្រួសារ ជនមានពិការភាព ៥គ្រួសារ អ្នកផ្ទុកមេរោគអេដស៍ ១គ្រួសារ និងជនទីទ័លលំបាក ៥គ្រួសារដែលនៅស្រុកកោះសូទិន ៤ខ្នង ស្ទឹងត្រង់ ៣ខ្នង បាធាយ ២ខ្នង កំពង់សៀម ៥ខ្នង ជើងព្រៃ ២ខ្នង កងមាស ៣ខ្នង ចម្ការលើ ២ខ្នង និងស្រុកព្រៃឈរ ១ខ្នង។

ក្នុងឱកាសនោះដែរ ឯកឧត្តម អ៊ុន ចាន់ដា បានកោតសរសើរ និងវាយតម្លៃខ្ពស់ចំពោះលទ្ធផលការងារដែលសម្រេចបានរបស់កម្មវិធីផ្តល់ផ្ទះមនុស្សធម៌ខេត្តកំពង់ចាមរយ:ពេល ៤ឆ្នាំនេះហើយចាត់ទុកការស្ម័គ្រព្រះទ័យនិមន្តចូលរួមរបស់ព្រះមេគណខេត្ត ព្រះអនុគណក្រុង ស្រុក និងសហការីព្រមទាំង ការចូលរួមរបស់សប្បុរសជនគ្រប់មជ្ឈដ្ឋាន ក្នុងកម្មវិធីថ្មីនេះជាការរួមចំណែកជាមួយកាកបាទក្រហមកម្ពុជាដែលមានសម្តេចកិត្តិព្រឹទ្ធបណ្ឌិតជាប្រធានក្នុងការងារលើកកម្ពស់សុខុមាលភាពដល់ជនងាយរងគ្រោះបំផុត ដែលនេះគឺជាការលើកកម្ពស់គោលការណ៍គ្រឹះ និងតម្លៃមនុស្សធម៌ស្របតាមទិសស្លោក “ទីណាមានទុក្ខលំបាក ទីនោះមានកាកបាទក្រហមកម្ពុជា”។

ឯកឧត្តមប្រធានគណៈកម្មាធិការសាខាក៏បានអំពាវនាវដល់សប្បុរសជនគ្រប់មជ្ឈដ្ឋាន និងអង្គការដៃគូនានា សូមមេត្តាបន្តចូលរួមឧបត្ថម្ភគាំទ្រតាមរយ:ចលនាចូលរួមជាសមាជិកភាពមូលនិធិ និងចូលរួមបង់វិភាគទានតាមការស្ម័គ្រចិត្ត និងលទ្ធភាពដល់កម្មវិធីផ្តល់ផ្ទះមនុស្សធម៌ខេត្តកំពង់ចាមនេះឱ្យបានច្រើនកុះករជាបន្តទៀតដើម្បីជួយសង្គ្រោះ ជួយដោះស្រាយទុក្ខលំបាកជនក្រីក្រ ងាយរងគ្រោះជាអាទិភាពទាំងឡាយដែលខ្វះលទ្ធភាពហើយត្រូវការលំនៅដ្ឋានស្នាក់នៅ៕