ល្បែងមាន់ជល់តាមអនឡាញកំពុងតែពេញនិយមនៅភូមិត្រពាំងថ្លឹង១ សង្កាត់ចោមចៅ១ ខណ្ឌពោធិ៍សែនជ័យខណ:សមត្ថកិច្ចមូលដ្ឋានហាក់ធ្វើមិនដឹង

(ភ្នំពេញ)៖ ទីតាំងជល់មាន់តាមប្រព័ន្ធអនឡាញមួយកន្លែងចាប់ផ្តើមបើកដំណើរការលេងឡើងវិញហើយបន្ទាប់ពីបានបិទមួយរយៈ បន្ទាប់ពីប្រមុខរាជរដ្ឋាភិបាលប្រកាសឱ្យបិទ រាល់ល្បែងស៊ីសងទាំងអស់ក្នុងព្រះរាជាណាចក្រកម្ពុជា តែឥឡូវនេះស្រាបតែនៅក្នុងភូមិត្រពាំងថ្លឹង១ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញកំពុងតែបើកលេងយ៉ាងសកម្មខណៈអាជ្ញាធរ និងសមត្ថកិច្ចនៅក្នុងមូលហាក់បីដូចជានាំគ្នារក្សាភាពស្ងៀមស្ងាត់ធ្វើមិនដឹងមិនឮ។

តាមប្រភពបានឱ្យដឹងថា ទីតាំងខាងលើនេះបានបើកដំណើរការលេងដោយដាក់តាម (កញ្ចក់ទូរទស្សន៍ធំៗ) ជាប់ផ្លូវធំជារៀងរាល់ថ្ងៃ ហាក់បីដូចជាមិនខ្លាចញញើតនឹងច្បាប់បន្តិចសោះឡើយបើទោះបីជាប្រមុខរាជរដ្ឋាភិបាល ពិសេសសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានឱ្យអភិបាលខេត្តក្រុងទូទាំងរាជធានីខេត្តធ្វើការបិទរាល់ល្បែងស៊ីសងតាមអនឡាញគ្រប់ប្រភេទ កាលពីថ្ងៃទី១៨ ខែកុម្ភៈ ឆ្នាំ២០២៤ កន្លងមកថ្មីៗនេះ។

អ្វីដែលជាការហួសចិត្ត ភាពព្រងើយកន្តើយ ធ្វើមិនដឹងមិនឮ ឬបិទភ្នែកបិទត្រចៀករបស់អាជ្ញាធរនិងសមត្ថកិច្ចនៅក្នុងភូមិត្រពាំងថ្លឹង១ សង្កាត់ចោមចៅទី១ ខណ្ឌពោធិ៍សែនជ័យរាជធានីភ្នំពេញកំពុងតែធ្វើឱ្យប្រជាពលរដ្ឋ នៅក្នុងមូលដ្ឋានមានមន្ទិលសង្ស័យថា អស់លោកទំនងជាទទួលបានលាភសក្ការៈពីម្ចាស់ទីតាំងជល់មាន់តាមអនឡាញខាងលើនេះហើយមើលទៅទើបបានជានាំគ្នារក្សាភាពស្ងៀមស្ងាត់បែបនេះ។

បើតាមសេចក្តីរាយការណ៍ពីប្រជាពលរដ្ឋ នៅក្នុងមូលដ្ឋានបានបន្តឱ្យដឹងទៀតថា  ជាទូទៅគេតែងតែសង្កេតឃើញក្រុមអ្នកញៀនល្បែងបាននាំគ្នាពពាក់ពពូនចូលទៅលេងល្បែងស៊ីសងមាន់ជល់អនឡាញយ៉ាងគគ្រឹកគគ្រេងជារៀងរាល់ថ្ងៃ។

ទោះជាយ៉ាងណាពាក់ព័ន្ធនឹងករណីទីតាំងមាន់ជល់តាមប្រព័ន្ធអនឡាញខាងលើនេះ មហាជនបានសំណូមពរដល់ស្នងការរាជធានីភ្នំពេញ សូមមេត្តាចាត់មន្ត្រីជំនាញចុះពិនិត្យស្រាវជ្រាវទីតាំងខាងលើនេះផងទានដើម្បីភូមិឃុំមានសុវត្ថិភាព និងដើម្បីគោរពតាមអនុសាសន៍ដ៏ខ្ពង់ខ្ពស់សម្ដេចមហាបវរធិបតីហ៊ុន ម៉ាណែត នាយករដ្ឋមន្ត្រី និងចូលរួមចំណែកបញ្ចៀសអំពើចោរកម្មផ្សេងៗក្នុងមូលដ្ឋានដូចជាចោរលួច ចោរឆក់ ចោរ ប្លន់គាស់ផ្ទះជាពិសេសករណីអំពើហិង្សាក្នុងគ្រួសារជាដើម៕