ទីតាំងបង្កប់ល្បែងសុីសងតាមអនឡាញដ៏ធំនៅហាងកាហ្វេមួយកន្លែងមានយីហោ(តូតូ កាហ្វេ ToTo cafe)
ភ្នំពេញ៖ ទីតាំងបង្កប់ល្បែងសុីសងតាមអនឡាញដ៏ធំនៅហាងកាហ្វេមួយកន្លែងមានយីហោ(តូតូ កាហ្វេ ToTo cafe) បាននឹងកំពុងបេីក លេងយ៉ាងគគ្រឹកគគ្រេងដេីម្បីស្វាគមន៍អតិថិជនមកពីគ្រប់មជ្ឈដ្ឋានទាំងអស់ដោយមិនរំខានដល់អាជ្ញាធរមានសមត្ថកិច្ចនៅក្នុងមូលដ្ឋាននោះឡើយ ។
បើតាមអ្នកចេញចូលហូបកាហ្វេក៏ដូចជាអ្នកលេងល្បែងសុីសងតាមអនឡាញខាង លើបានខ្សឹបប្រាប់អ្នកសារព័ត៌មានយើងថា ទីតាំងខាងលើនេះគឺមានល្បែងសុីសងជាច្រើនប្រភេទដូចជា ៖ ល្បែងភ្នាល់បាល់, ជល់មាន់ និងឡូតូអនឡាញផង ដែរ ។
ប្រជាពលរដ្ឋរស់នៅជិតទីតាំងនោះបានឱ្យអ្នកសារព័ត៌មានដឹងថា ចំពោះទីតាំង ហាងលក់កាហ្វេនេះពួកគាត់ឃើញមានមនុស្សចេញចូលលេងល្បែងសុីសងតាម អនឡាញ ជាហូរហែដោយមានក្រុមអ្នកញៀនល្បែងចូលលេងពពាក់ពពូនគ្នាយ៉ាងច្រើនកុះករទៀតផងដោយមិនខ្លាចញញើតអ្វីទាំងអស់ហាក់បីដូចប្រទេសគ្មានច្បាប់។
ប្រជាពលរដ្ឋបានដាក់ការសង្ស័យថា ប្រហែលជាទីតាំងមួយកន្លែងនេះម្ចាស់ទីតាំងបានសែនសំណែនព្រេនជូនដល់អាជ្ញាធរមានសមត្ថកិច្ចពាក់ព័ន្ធអស់ទេដឹងបានជាមិនធ្វើការបង្ក្រាបបែបនេះបែរជាបណ្ដែតបណ្ដោយឱ្យក្រុមអ្នកញៀនល្បែងបើកលេងបានយ៉ាងរលូនឬមួយខ្លាចបែកឆ្នាំងបាយទេដឹងបានជាអាជ្ញាធរមានសមត្ថ កិច្ចក្នុងមូលដ្ឋានសំងំស្ងៀមបែបនេះ។
កាលពីពេលថ្មីៗនេះក្រសួងសុខាភិបាលបានចេញសេចក្តីប្រកាសព័ត៌មានមួយជូនប្រជាពលរដ្ឋទូទាំងប្រទេសថាសូមមានការប្រុងប្រយ័ត្នចំពោះជំងឺកូវីត-១៩ទើបនឹងបំឡែងខ្លួនថ្មីឈ្មោះថា(អូមីក្រុង) ដោយឡែកទីតាំងល្បែងស៊ីសងមួយនេះហាក់មិនញញើតនិងមិនគោរពតាមសរាចរណែនាំរបស់រាជរដ្ឋាភិបាលនិងក្រសួងសុខាភិបាលនោះឡេីយ។
គួរបញ្ជាក់ថា កន្លងមកលោក ឃួង ស្រេង អភិបាលរាជធានីភ្នំពេញបានប្រាប់ ឱ្យ អភិបាលខណ្ឌ ទាំង១៤ ចុះបង្ក្រាបទីតាំងដែលបង្កប់ល្បែងភ្នាល់គ្រប់ប្រភេទដូចជា ហ្គេមបាញ់ត្រី ហ្គេម Internet Online និងល្បែងស៊ីផ្សេងទៀតផង។
លោក ឃួង ស្រេង បានបញ្ជាក់ទៀតថា បើសិនជា រកឃើញថា ទីតាំងណាដែលបើកល្បែងស៊ីសង ហ្គេមបាញ់ត្រី សេវាកម្ម Internet លួចបង្កប់ការលេងល្បែងស៊ីសង Online ត្រូវតែចាត់វិធានការ តាមផ្លូវច្បាប់ បិទអាជីវកម្មនោះហើយត្រូវធ្វើការឃាត់ខ្លួនម្ចាស់អាជីវកម្មផងដែរ។
ការបញ្ជានេះ ធ្វើឡើងក្នុងកិច្ចប្រជុំគណៈបញ្ជាឯកភាពរាជធានីភ្នំពេញ ដោយមានការចូលរួមពីអភិបាលរងរាជធានីភ្នំពេញ ស្នងការនគរបាលរាជធានីភ្នំពេញ មេបញ្ជាការកងរាជអាវុធហត្ថរាជធានី អាជ្ញាធរខណ្ឌទាំង១៤ រួមទាំង មន្ដ្រីជំនាញពាក់ព័ន្ធជារូបច្រើនទៀត។
ទន្ទឹមគ្នានោះដែរ លោក ឃួង ស្រេង បានសង្កត់ធ្ងន់ៗថា អាជ្ញាធរមានសមត្ថ កិច្ចក៏ដូចជាអាជ្ញាធរដែនដីត្រូវត្រួតពិនិត្យឱ្យបានម៉ត់ចត់បំផុត មិនត្រូវអនុញ្ញាតឱ្យមានល្បែងស៊ីសងប្រភេទហ្គេមបាញ់ត្រី និងអាជីវកម្ម ណេត កាហ្វេ អនឡាញ ដែលមានបង្កប់ល្បែងស៊ីសងនៅក្នុងមូលដ្ឋាន ជាដាច់ខាតក្នុងករណីដែលមាននៅក្នុងមូលដ្ឋាន របស់ខ្លួនត្រូវបង្ក្រាបភ្លាមៗទាំងអ្នកលេង និងម្ចាស់ទីតាំងដែលប្រកបអាជីវកម្មខុសច្បាប់នេះ ។
សូមរំលឹកថា កន្លងមកសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ធ្លាប់ដាក់បទបញ្ជាឱ្យមន្ត្រីនគរបាលពាក់ព័ន្ធ ក្រោមឱវាទទូទាំងប្រទេសត្រូវតែបង្ក្រាបរាល់ល្បែងសុីសងខុសច្បាប់គ្រប់ប្រភេទមិនត្រូវមានការយោគយល់ឡើយ ដើម្បីធានាឱ្យបាននូវសុខសុវត្ថិភាពជូនប្រជាពលរដ្ឋឱ្យស្របតាម គោលនយោបាយ ភូមិ ឃុំ មានសុវត្ថិភាពទាំង ៧ចំណុចរបស់រដ្ឋាភិបាលដែលដាក់ចេញដោយក្រសួងមហាផ្ទៃ ។
យ៉ាងណាក្តី ប្រជាពលរដ្ឋនៅតែទទូចស្នើសុំដល់មន្ត្រីពាក់ព័ន្ធក្នុងមូលដ្ឋានដែលមានលោក ពេជ្រ កែវមុនី អភិបាលខណ្ឌ និងលោក អ៊ុក បូនីន អធិការខណ្ឌទេីបឡេីងមកកាន់តំណែងថ្មីៗ សូមមេត្តាចុះត្រួតពិនិត្យនិងបង្ក្រាបល្បែងស៊ីសងខាងលើនេះដើម្បីរក្សាការពារសន្តិសុខនិងភូមិឃុំមានសុវត្ថិភាពទាំង៧ចំណុចរបស់ក្រសួងមហាផ្ទៃជាពិសេសគឺសេចក្តីសុខរបស់ប្រជាពលរដ្ឋក្នុងមូលដ្ឋាន៕
