ល្បីថាជនល្មើសឈ្មោះ ម៉ាប់ និងឈ្មោះ ញ៉ាញ់ បានឈូសឆាយព្រៃភ្នំធ្វើជាផ្លូវទៅដល់តំបន់ព្រៃភ្នំក្រមុំជ្រើម ដើម្បីធ្វើសកម្មភាពកាប់ឈើនៅលើភ្នំជាតំបន់ការពារនោះ
បើអញ្ចឹងមែននោះ???
ខេត្តពោធិ៍សាត់= យោងតាមប្រភពពីបងប្អូនប្រជាពលរដ្ឋរស់នៅស្រុកភ្នំក្រវ៉ាញ បានឲ្យrssk-news ដឹងថា មួយរយៈចុងក្រោយនេះមានក្រុមជនល្មើសឈ្មោះ ម៉ាប់ និងឈ្មោះ ញ៉ាញ់ បានឈូសឆាយព្រៃភ្នំធ្វើជាផ្លូវទៅដល់តំបន់ព្រៃភ្នំក្រមុំជ្រើម ដើម្បីធ្វើសកម្មភាពកាប់ឈើនៅលើភ្នំជាតំបន់ការពារនោះ ហើយបន្តដឹកជញ្ជូនឈើចេញពីតំបន់នោះដោយគ្មានញញើតអ្វីទាំងអស់ ។
ជាក់ស្តែងប្រជាពលរដ្ឋដែលរស់នៅក្នុងភូមិម៉ុងការី ឃុំរវៀង ស្រុកភ្នំក្រវាញ ខាងលើបានបញ្ជាក់ថា ឈ្មួញ២នាក់ ឈ្មោះ ម៉ាប់ និងឈ្មោះ ញ៉ាញ់ នេះបច្ចុប្បន្នកំពុងបំពានចូលកាប់ឈើក្នុងព្រៃភ្នំក្រមុំជ្រើម អូរឆ្ពង់ ហើយដឹកជញ្ជូនចេញយ៉ាងពេញបន្ទុកព្រោះគ្មានមន្ត្រីជំនាញនិងសមត្ថកិច្ចពាក់ព័ន្ធណាចាត់វិធានការទប់ស្កាត់ឡើយ ។
ចំណែកមន្ត្រីអាជ្ញាធរនិងសមត្ថកិច្ចពាក់ព័ន្ធក្នុងស្រុកភ្នំក្រវាញ បានរក្សាភាពស្ងៀមស្ងាត់ទុកឲ្យឈ្មួញឈ្មោះ ម៉ាប់ និងឈ្មោះ ញ៉ាញ់ បំផ្លាញព្រៃឈើក្នុងឃុំរវៀង យ៉ាងពេញបន្ទុកហើយមិនខ្វល់ពីការរិះគន់អ្វីទាំងអស់។ សេចក្ដីរាយការណ៍ពីប្រជាពលរដ្ឋក្នុងភូមិម៉ុងការី បានឲ្យដឹងថា បច្ចុប្បន្នឈ្មួញឈ្មោះ ម៉ាប់ និងឈ្មោះ ញ៉ាញ់ មានរថយន្តម៉ាករ៉េវចំនួន៤គ្រឿងនិងត្រាក់ទ័រ២គ្រឿងកំពុងឈូសឆាយធ្វើផ្លូវកាប់ឈើ ដឹកជញ្ជូនឈើចេញពីតំបន់ព្រៃភ្នំក្រមុំជ្រើម យ៉ាងសុខស្រួលដោយគ្មានមន្ត្រីជំនាញឬសមត្ថកិច្ចពាក់ព័ន្ធទប់ស្កាត់ទាល់តែសោះ។ បើតាមប្រជាពលរដ្ឋក្នុងឃុំរវៀង បានបញ្ជាក់ថា មន្ត្រីជំនាញនិងសមត្ថកិច្ចពាក់ព័ន្ធដូចជា មន្ត្រីបរិស្ថាន មន្ត្រីរដ្ឋបាលព្រៃឈើ មន្ត្រីអង្គការក្រៅរដ្ឋាភិបាល ក៏ដូចជាសមត្ថកិច្ចនគរបាលនិងសមត្ថកិច្ចអាវុធហត្ថ ទទួលបានផលប្រយោជន៍ជាប្រចាំទើបមិនបង្ក្រាបឈ្មួញឈ្មោះ ម៉ាប់ និងឈ្មោះ ញ៉ាញ់ ហើយទុកឲ្យឈ្មួញទាំង២នាក់នេះធ្វើអ្វីៗតាមអំពើចិត្ត។ ប្រភពដែលស្និទ្ធនឹងឈ្មួញឈ្មោះ ម៉ាប់ និងឈ្មោះ ញ៉ាញ់ បានឲ្យដឹងថា សម្រាប់ឈើមួយរថយន្តឈ្មួញទាំង២នាក់នេះបង់លុយឲ្យមន្ត្រីជំនាញនិងសមត្ថកិច្ចពាក់ព័ន្ធយ៉ាងតិចចាប់ពី២០០ដុល្លារដល់៤០០ដុល្លារទើបអាចគេចផុតពីការបង្ក្រាបយ៉ាងរលូន។ ប្រជាពលរដ្ឋក្នុងភូមិម៉ុងការី ឃុំរវៀង បានឲ្យដឹងថា ព្រៃឈើនៅក្នុងតំបន់ព្រៃភ្នំក្រមុំជ្រើម អូរឆ្ពង់ កំពុងប្រឈមនឹងសេចក្ដីវិនាសព្រោះឈ្មួញឈ្មោះ ម៉ាប់ និងឈ្មោះ ញ៉ាញ់ ធ្វើសកម្មភាពបំផ្លាញយ៉ាងពេញបន្ទុកដោយគ្មានញញើតអ្វីឡើយ ។
ប្រជាពលរដ្ឋបានលើកឡើងបន្តថា កន្លងមកកម្លាំងសមត្ថកិច្ចអាវុធហត្ថធ្លាប់ចាត់វិធានការបង្ក្រាបរថយន្តដឹកឈើ២គ្រឿងរបស់ឈ្មួញឈ្មោះ ម៉ាប់ និងឈ្មោះ ញ៉ាញ់ នេះផងដែរ ប៉ុន្តែឥឡូវនេះពួកគេនៅតែបន្តកាប់ឈើនិងដឹកជញ្ជូនឈើយ៉ាងរលូន ព្រោះអាងមានខ្នងបង្អែករឹងមាំចាំជួយដោះស្រាយ ។
ពាក់ព័ន្ធនិងបញ្ហានេះ ខាងអង្គភាពrssk-news យើងខ្ញុំនៅពុំទាន់សុំការពន្យល់ណាមួយពីលោក ប៉ាន់ មរកត ប្រធានមន្ទីបរិស្ថានខេត្តពោធិ៍សាត់ បាននៅឡើយទេដោយសារទូរស័ព្ទខលមិនចូល ដោយឡែកខាងមន្ត្រីពាក់ព័ន្ធក្នុងខេត្តនេះយើងខ្ញុំមិនមានលេខទូរស័ព្ទ ។ ខាងអង្គភាព rssk-news យើងរង់ចាំទទួលការបកស្រាយរាល់ម៉ោងការងារ តាមរយះលេខទូរស័ព្ទ 095672231/081680133 ៕