សាខាកាកបាទក្រហមកម្ពុជាខេត្តព្រៃវែងប្រារព្ធព្រះរាជពិធីបុណ្យចម្រើនព្រះជន្ម សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ

(ព្រៃវែង)៖ ឯកឧត្តម សួន សុម៉ាលីន ប្រធានគណៈកម្មាធិការសាខាកាកបាទក្រហមកម្ពុជាខេត្តព្រៃវែងបានដឹកនាំគណៈកម្មាធិការសាខា ក្រុមប្រតិបត្តិសាខាបានរៀបចំប្រារព្ធព្រះរាជពិធីបុណ្យចម្រើនព្រះជន្មសម្ដេចព្រះមហាក្សត្រី នរោត្តម មុនិនាថ សីហនុ ព្រះវររាជ មាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គលនៅក្នុងព្រះរាជឱកាសនៃព្រះរាជពិធីបុណ្យចម្រើនព្រះជន្មវស្សា គម្រប់៨៩ព្រះវស្សាយាងចូល៩០ព្រះវស្សានៅព្រឹកថ្ងៃទី១៧ ខែមិថុនា ឆ្នាំ២០២៥ ដែលប្រារព្ធធ្វើនៅវត្តសំសមី ក្រុងព្រៃវែង ខេត្តព្រៃវែង។

នៅក្នុងព្រះរាជឱកាសដ៏មហានក្ខត្តឫក្សឧត្តុង្គឧត្តមប្រសើរថ្លៃថ្លាប្រកបដោយក្តីសោមនស្សរីករាយបំផុតនៃព្រះរាជពិធីបុណ្យចម្រើនព្រះជន្មវស្សា សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល គម្រប់៨៩ព្រះវស្សា យាងចូល៩០ព្រះវស្សាដែលនឹងប្រព្រឹត្តទៅនាថ្ងៃពុធ ៨រោច ខែជេស្ឋ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី១៨ ខែមិថុនា ឆ្នាំ២០២៥ ខាងមុខនេះ ឯកឧត្ដម សួន សុម៉ាលីន តាំងនាមប្រធានគណៈកម្មាធិការសាខាកាកបាទក្រហមកម្ពុជាខេត្តព្រៃវែង សូមក្រាបថ្វាយនូវអំណរសាទរដោយស្មោះអស់ពីដួងចិត្ត និងសូមថ្វាយនូវព្រះសព្ទសាធុការពរជ័យ សិរីសួស្តី ជ័យមង្គល វិបុលសុខ បវរមហាប្រសើរគ្រប់ប្រការ ថ្វាយសម្តេចព្រះមហាក្សត្រី ព្រះវររាជមាតាជាតិខ្មែរជាទីគោរពសក្ការៈដ៏ខ្ពង់ខ្ពស់បំផុត សូមព្រះអង្គទ្រង់ប្រកបដោយព្រះរាជសុខភាពល្អបរិបូរណ៍ ព្រះពលានុភាពរឹងមាំខ្លាំងក្លា ព្រះបញ្ញាញាណភ្លឺថ្លាវាងវៃ ត្រចះត្រចង់ ព្រះជន្មាយុយឺនយូរជាងរយព្រះវស្សា និងចាកផុតពីព្រះរោគាព្យាធិនានាជាអង្វែងតរៀងទៅ ដើម្បីទ្រង់គង់ជាម្លប់ដ៏ត្រជាក់ត្រជំសុខសាន្តមនោរម្យដល់ប្រជានុរាស្ត្រខ្មែរទូទាំងព្រះនគរ។

ឆ្លៀតក្នុងព្រះរាជឱកាសដ៏មហាសិរីមង្គលាភិរម្យឧត្តុង្គឧត្តមប្រពៃថ្លៃថ្លានេះ ឯកឧត្ដម សួន សុម៉ាលីន សូមព្រះបរមរាជានុញ្ញាតដ៏ខ្ពង់ខ្ពស់បំផុត ក្រាបបង្គំថ្វាយនូវកតញ្ញូតាធម៌និងកតវេទិតាធម៌យ៉ាងជ្រាលជ្រៅបំផុតថ្វាយ សម្តេចព្រះមហាក្សត្រី ព្រះវររាជមាតាជាតិខ្មែរ ដែលព្រះអង្គទ្រង់សព្វព្រះរាជហឫទ័យគង់ប្រថាប់ជាព្រះប្រធានកិត្តិយសនៃកាកបាទក្រហមកម្ពុជា ក្រុមប្រឹក្សាជាតិកម្ពុជាដើម្បីស្ត្រី និងសមាគមកាយឫទ្ធិនារីកម្ពុជាដោយបំពេញនូវព្រះរាជកិច្ចដ៏មហាប្រពៃថ្លៃថ្លាបំផុតប្រកបដោយព្រះរាជគុណធម៌ ព្រះព្រហ្មវិហាធម៌ និងព្រះទសពិធរាជធម៌ក្នុងការលើកកម្ពស់ការងារមនុស្សធម៌ ការលើកតម្កើងតួនាទីស្ត្រីក្នុងសង្គមជាពិសេសការប្រោសព្រះរាជទាននូវព្រះរាជទ្រព្យយ៉ាងច្រើនជាបន្តបន្ទាប់ក្នុងព្រះរាជសកម្មភាពនៃការបំពេញកិច្ចសន្សំ បុញ្ញកុសលក្នុងវិស័យព្រះពុទ្ធសាសនា អប់រំសិក្សាធិការ សុខាភិបាល សង្គមកិច្ច វប្បធម៌ សិល្បៈ សុខុមាលភាពសង្គម និងជីវភាពរស់នៅដល់ប្រជានុរាស្ត្ររបស់ព្រះអង្គនៅទូទាំងព្រះរាជាណាចក្រកម្ពុជឱ្យរឹងរឹតតែមានវឌ្ឍនភាពជឿនលឿនប្រកបដោយសេចក្តីសុខក្សេមក្សាន្ត ចម្រុងចម្រើន និងរុងរឿង។

ជាថ្មីម្តងទៀត ឯកឧត្ដមប្រធានគណៈកម្មាធិការសាខាកាកបាទក្រហមកម្ពុជាខេត្ត សូមព្រះបរមរាជានុញ្ញាតលើកហត្ថប្រណម្យបួងសួងដល់វត្ថុស័ក្តិសិទ្ធិទាំងឡាយក្នុងលោក គុណបុណ្យព្រះរតនត្រ័យ គុណកែវទាំងបី ទេវតាថែរក្សាឆ្នាំថ្មី ឆ្នាំម្សាញ់ សប្តស័ក ព្រះនាម គោរាគទេវី ទេវតាថែរក្សាព្រះមហាស្វេតច្ឆត្រ បុណ្យបារមីនៃដួងព្រះវិញ្ញាណក្ខន្ធអតីតព្រះមហាក្សត្រ ព្រះមហាក្សត្រិយានីខ្មែរគ្រប់ព្រះអង្គជាពិសេសបុណ្យបារមី ព្រះករុណាព្រះបាទសម្តេចព្រះនរោត្តម សីហនុ ព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋ សូមតាមជួយបីបាច់ថែរក្សា ការពារ អភិបាល ប្រោះព្រំនូវព្រះសព្ទសាធុការពរជ័យគ្រប់ប្រការថ្វាយសម្តេចព្រះមហាក្សត្រី ព្រះវររាជមាតាជាតិខ្មែរ សូមព្រះអង្គទ្រង់ប្រកបដោយព្រះពុទ្ធពរដ៏ឧត្តុង្គឧត្តមថ្លៃថ្លាទាំងបួនប្រការគឺ អាយុ វណ្ណៈ សុខៈ និងពលៈ ជាភិយ្យោភាពអង្វែងតរៀងទៅ។

បន្ទាប់ពីបានប្រារព្វពិធីសូត្រមន្តចម្រើនព្រះបរិត្តទៅតាមទំនៀមទម្លាប់ប្រពៃណីរួចមក ឯកឧត្តមប្រធានគណៈកម្មាធិការសាខាបានប្រគេនបច្ច័យសម្រាប់ព្រះសង្ឃ និងបច្ឆ័យកសាងវត្តដល់ព្រះសង្ឃគង់នៅវត្តសំសមី និងបានជូនវត្ថុអនុស្សាវរីយ៍ជូនតាជី យាយជីចំនួន ៥០នាក់ផងដែរ៕