តើមានអាថ៌កំបាំងអីនៃរឿងអ្នកឧកញ៉ា គិត ធាង ថៅកែក្លឹបរ៉ក់ “Rock Club” បងប្រុសលោកគិតម៉េង ដែលជាប់ពន្ធាគារ៤ឆ្នាំ តែដេកតែក្នុងមន្ទីរពេទ្យ
រាជធានីភ្នំពេញ ៖ មហាជនកំពុងរិះគន់យ៉ាងខ្លាំងចំពោះចំណាត់ការរបស់សមត្ថកិច្ច ពាក់ព័ន្ធ សំខាន់តុលាការដែលបាននិងកំពុងបង្ហាញនូវនិតិវិធីទន់ខ្សោយឬក៏តាមនិតិវិធីក្រៅ ច្បាប់នៅក្នុងសង្គមកម្ពុជា ខណ:ដែលឧកញ៉ា គិត ធាង ដែលសមត្ថកិច្ចកិច្ចរកឃើញជាប់ពាក់ ព័ន្ធសំណុំរឿងជួញដូរគ្រឿងញៀនដ៏ធំសម្បើមនៅកម្ពុជា ហើយត្រូវតុលាការកាត់ទោសឲ្យ ជាប់ពន្ធនាគារតែ៤ឆ្នាំ ។ប៉ុន្តែរហូតមកដល់ពេលនេះជនជាប់ចោទឈ្មោះ គិត ធាង មិនទាន់បានចូលទៅអនុវត្តច្បាប់នៅពន្ធនាគារនៅឡើយទេ ។ តាមព័ត៌មានទទួលបានក្រៅផ្លូវការបច្ចុប្បន្ននេះលោកឧកញ៉ា គិត ធាង ត្រូវបានគេដឹងថា ស្ថិតនៅក្នុងមន្ទីរពេទ្យរដ្ឋដ៏ធំមួយដោយរស់ក្នុងម៉ាស៊ីនត្រជាក់ ហូបស្រួល ដេកស្រួល ក្រោមហេតុផលមានជំងឺថប់ដង្ហើមនិងជំងឺសួតធ្ងន់ធ្ងរ ។
ប៉ុន្តែគេដឹងថា មុនកើតមានករណីពាក់ព័ន្ធជួញដូរគ្រឿងញៀន ហើយត្រូវតុលាការផ្តន្ទាទោសនោះ លោកឧកញ៉ា គិត ធាង មានសុខភាពល្អធម្មតា ។ ដូច្នេះមហាជនមើលឃើញថាឧកញ៉ា គិត ធាង មានសំណាងជាងអ្នកទោសដ៏ទៃទៀត សំខាន់អ្នកទោសគ្រឿងញៀនដូចគ្នាដែលអ្នកទោសខ្លះគ្រាន់តែជាប់ពាក់ព័ន្ធការជួញដូរគ្រឿងញៀនមួយកញ្ចប់ ឬពីរកញ្ចប់តូចក៏ត្រូវសមត្ថកិច្ចចាប់វ៉ៃខ្នោះបញ្ជូនទៅតុលាការ ហើយរុញបញ្ចូលគុកដែរ។
សូមជម្រាបថា លោកឧកញ៉ា គិត ធាង ម្ចាស់មជ្ឈមណ្ឌលកម្សាន្តរ៉ុក “Club Rock”ត្រូវបានតុលា ការផ្តន្ទាទោសឲ្យជាប់ពន្ធនាគារ៤ឆ្នាំ ក្រោមបទល្មើសចាត់ចែងសម្រួលឲ្យមានការប្រើប្រាស់ ដោយខុសច្បាប់នូវសារធាតុញៀននិងបទសមគំនិត។ ពាក់ព័ន្ធសំណុំរឿងខាងលើនេះដែរក៏មានមនុស្សយ៉ាងតិច២៤នាក់ផ្សេងទៀតត្រូវបានតុលាការផ្ទន្ទាទោសដាក់ពន្ធនាគារក្នុងម្នាក់ៗ ពីមួយឆ្នាំដល់៤ឆ្នាំផងដែរ ។
ដោយឡែកមនុស្ស ២នាក់ត្រូវបានលើកលែងទោស ។ ចំពោះករណីលោកឧកញ៉ា គិត ធាង ដែលជាប់ពាក់ព័ន្ធករណីគ្រឿងញៀន រហូតដល់ ៥០គីឡូក្រាម ហើយត្រូវបានតុលាការផ្តន្ទាទោសតែ៤ឆ្នាំនោះ ក៏ត្រូវបានមហាជនរិះគន់យ៉ាង ចាស់ដៃផងដែរ ព្រោះថា កំរិតនៃការផ្តន្ទាទោសនោះតិចតួចខ្លាំងណាស់ បើប្រៀបធៀបជន ល្មើសគ្រឿងញៀនដទៃទៀត ។
ប៉ុន្តែអ្វីដែលធ្វើឲ្យមហាជនរិះគន់ខ្លាំងមែនទែននោះគឺក្រោយការផ្តន្ទាទោសលោក ឧកញ៉ា គិត ធាង មិនបានចូលពន្ធនាគារ ដើម្បីអនុវត្តទោសនោះឡើយ ហើយបែរជាសម្រាក នៅមន្ទីរពេទ្យមានម៉ាស៊ីនត្រូវជាក់ ហូបស្រួល ដេកស្រួលទៅវិញក្រោមលេសមានជំងឺធ្ងន់ធ្ងរ ។ ករណីដូចគ្នានេះក៏ត្រូវបានគេប្រទះឃើញដូចគ្នាសម្រាប់អ្នកមានលុយមានអំណាចមួយចំនួនដែល តែងតែរកលេសមានជំងឺចូលសម្រាកពេទ្យគេចវេសពីការដេកក្នុងពន្ធនាគារ ។
គួររម្លឹកឡើងវិញថា លោកឧកញ៉ា គិត ធាង ត្រូវកម្លាំងនគរបាលចម្រុះនាំខ្លួនទៅស្នងការដ្ឋាននគរបាលរាជធានីភ្នំពេញ នៅព្រលប់ថ្ងៃទី១១ ខែមីនា ឆ្នាំ២០១៩ ពីភូមិគ្រឹះរបស់លោក ស្ថិតនៅផ្លូវលេខ២៨៩ ក្នុងសង្កាត់បឹងកក់១ ខណ្ឌទួលគោក។ ការនាំខ្លួនលោកឧកញ៉ា គិត ធាង ម្ចាស់ទីតាំងអតីតមជ្ឈមណ្ឌលកំសាន្តរ៉ុក”Club Rock”ដោយអនុវត្តតាមដីការបស់សាលាដំបូងរាជធានីភ្នំពេញ បន្ទាប់ពីមានប្រតិកម្មខ្លាំងៗពីសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។ បន្ទាប់មកនៅល្ងាចថ្ងៃទី១២ ខែមិនា ឆ្នាំ២០១៩ ចៅក្រមស៊ើបសួរនៃតុលាការក្រុងភ្នំពេញបាន ចេញដីកាបង្គាប់ឲ្យឃុំខ្លួនឧកញ៉ារូបនេះដាក់ពន្ធនាគារជា បណ្តោះអាសន្នហើយ ពីបទ សម្រួលឱ្យប្រើប្រាស់ដោយខុសច្បាប់នូវសារធាតុញៀន តាមមាត្រាមាត្រា៤៤ ច្បាប់ស្តីពីការត្រួតពិនិត្យគ្រឿងញៀន ។
មាត្រា៤៤ កថាខណ្ឌទី២ ច្បាប់ស្តីពីការត្រួតពិនិត្យគ្រឿងញៀនចែងថា អំពើជួលទីកន្លែង ផ្តល់ទីកន្លែង ឬ អំពើផ្សេងទៀត ដែលបង្កលក្ខណៈងាយស្រួលដល់ការប្រើប្រាស់ដោយខុសច្បាប់នូវសារធាតុញៀន គឺ ជាបទសម្រួលឱ្យប្រើប្រាស់ដោយខុសច្បាប់នូវសារធាតុញៀន ត្រូវផ្តន្ទាទោសពី៥ឆ្នាំទៅ១០ឆ្នាំ និង ពិន័យជាប្រាក់ពី១០លានរៀលទៅ២០លានរៀល ៕
