អភិបាលខេត្តប៉ៃលិនចុះពិនិត្យហេដ្ឋារចនាសម្ព័ន្ធ និងការផ្តល់សេវាលើវិស័យអប់រំនៅសាលាអនុវិទ្យាល័យភ្នំយ៉ាត
(ខេត្តប៉ៃលិន)៖ លោកជំទាវ បាន ស្រីមុំ អភិបាលនៃគណៈអភិបាលខេត្តប៉ៃលិន នាព្រឹកថ្ងៃទី២៤ ខែមេសា ឆ្នាំ២០២៤ អញ្ជើញចុះពិនិត្យមើលហេដ្ឋារចនាសម្ព័ន្ធ និងការផ្តល់សេវាលើវិស័យអប់រំនៅសាលាអនុវិទ្យាល័យភ្នំយ៉ាត ស្ថិតក្នុងភូមិវត្ត សង្កាត់ប៉ៃលិន ក្រុងប៉ៃលិន ដើម្បីធ្វើការកែលម្អសេវា និងអភិវឌ្ឍន៍សាលាបន្ថែមទៀតបើទោះបីជាសាលាកន្លងមក បានទទួលជ័យលាភីចំណាត់ថ្នាក់លេខ១ សម្រាប់អង្គភាពផ្តល់សេវាសាធារណៈគំរូក្នុងវិស័យអប់រំប្រចាំឆ្នាំ២០២៣ ទូទាំងព្រះរាជាណាចក្រកម្ពុជា។
ការចុះពិនិត្យនេះលោកជំទាវ បាន ស្រីមុំ អភិបាលខេត្តប៉ៃលិនក៏បានជំរុញ និងណែនាំបន្ថែមដល់គណ:គ្រប់គ្រងសាលា និងលោកគ្រូ អ្នកគ្រូទាំងអស់ត្រូវតែមានកិច្ចសហការល្អដើម្បីធ្វើឱ្យសាលារៀនក្លាយជាថ្នាលអបរំដ៏មានប្រសិទ្ធភាព គុណភាព កន្លែងផ្តល់ចំណេះដឹងដល់សិស្សានុសិស្សប្រកបដោយគុណភាពពិតប្រាកដ។
លោកជំទាវអភិបាលក៏បានផ្តល់អនុសាសន៍ លើកទឹកចិត្ត គាំទ្រ ឧបត្ថម្ភ ក្នុងការកែលម្អបរិស្ថាន បង្កើនសោភណ្ឌភាពបន្ថែមទៀត ដើម្បីក្លាយជាសាលាគំរូរក្សាតំណែងជ័យលាភីចំណាត់ថ្នាក់លេខ១ សម្រាប់អង្គភាពផ្តល់សេវាសាធារណៈគំរូក្នុងវិស័យអប់រំ ប្រចាំឆ្នាំ២០២៤បន្តទៀត៕
