កុំចេះតែហាន!! ឆក់ទូរស័ព្ទដៃពីស្ត្រីរងគ្រោះបានសម្រេច តែរត់មិនរួចត្រូវអស់លក្ខណ៍ក្រោមថ្វីដៃអ្នករត់កង់បី
រាជធានីភ្នំពេញ ៖ ជនសង្ស័យពីរនាក់ត្រូវបានកម្លាំងនគរបាលប៉ុស្តិ៍រដ្ឋបាលសង្កាត់ទួលទំពូងទី២ ឃាត់ខ្លួនក្រោយពីពួកគេនាំគ្នាជិះម៉ូតូមួយគ្រឿងធ្វើសកម្មភាពឆក់ទូរស័ព្ទដៃម៉ាកសាំស៊ុងមួយគ្រឿងពីស្ត្រីម្នាក់ដែលកំពុងតែធ្វើដំណើរតាមឡាំប្រឺតាឥណ្ឌាបានហើយព្យាយាមជិះរត់គេចខ្លួនក៏ត្រូវបានអ្នកបើកបរបើកគៀរគៀបជាប់និងរថយន្តមួយគ្រឿងទៀតធ្វើអោយដួលរត់លែងរួច ។
ហេតុការណ៍នេះបានកើតឡើងកាលពីតវេលាម៉ោង ៤ និង ០០នាទីល្ងាច ថ្ងៃទី០១ ខែកុម្ភៈ ឆ្នាំ២០១៩ នៅចំណុចមុខផ្ទះលេខ១៣៤DEo ផ្លូវលេខ៤៣០ សង្កាត់ទួលទំពូងទី២ ខណ្ឌចំការមន ភ្នំពេញ ។
តាមមន្ត្រីនគរបាលបានប្រាប់pncTV News online ដឹងថា ជនសង្ស័យទាំង២នាក់ដែលបានចាប់ឃាត់ខ្លួននេះ មានទី១-ឈ្មោះ ជុំ វាសនា អាយុ១៩ឆ្នាំ មានមុខរបរមិនពិតប្រាកដ ស្នាក់នៅផ្ទះជួលម្តុំផ្សារសឡា ក្នុងសង្កាត់ស្ទឹងមានជ័យ ខណ្ឌមានជ័យ និងទី២-ឈ្មោះ ចេវ ស៊ីហ្វុង អាយុ ១៦ឆ្នាំ មុខរបរដឹកឥវ៉ាន់តាមអនឡាញ ស្នាក់នៅផ្ទះជួលម្តុំផ្សារសឡា សង្កាត់ស្ទឹងមានជ័យ ខណ្ឌមានជ័យ ។
មុនពេលកើតហេតុស្ត្រីវ័យចំណាស់ជាជនរងគ្រោះម្នាក់បានធ្វើតំណើរតាមឡាំប្រឺតាឥណ្ឌាមួយគ្រឿងដោយកាន់ទូរស័ព្ទដៃម៉ាកសាំស៊ុងមួយគ្រឿងក្នុងដៃក៏ស្រាប់តែក្រុមជនសង្ស័យទាំង២នាក់បានជិះម៉ូតូម៉ាក Let’s ពណ៌ស ពាក់ផ្លាកលេខ ភ្នំពេញ ១FR-១២៩៦ មួយគ្រឿងមកក្បែរ និងធ្វើសកម្មភាពឆក់យកតែម្តង ។
តាមប្រភពដដែល បានប្រាប់បន្តទៀតថា ពេលដែលក្រុមជនសង្ស័យខាងលើនាំគ្នាធ្វើសកម្មភាពឆក់យកទូរស័ព្ទដៃម៉ាកសាំស៊ុងមួយគ្រឿងពីដៃរួចហើយស្ត្រីវ័យចំណាស់រងគ្រោះក៏បានស្រែកឆោឡោថា «ចោរៗ» ឡើង ភ្លាមនោះបុរសជាអ្នកបើកបរឡាំប្រឺតាក៏បានបួងចង្កូតគៀរម៉ូតូរបស់ជនសង្ស័យទាំង២នាក់ទៅគៀបជាប់នឹងរថយន្តមួយគ្រឿងទៀតបណ្តាលអោយដួលហើយ កម្លាំងល្បាតក៏បានមកដល់និងជួយអន្តរាគមន៍ចាប់បានភ្លាមតែម្តង ដោយទូរស័ព្ទដៃមួយគ្រឿងនោះបែកអេក្រង់ខ្ទេចរងការខូចខាតផងដែរ ។
ក្រោយពេលកើតហេតុ ទូរស័ព្ទដៃម៉ាកសាំស៊ុងមួយគ្រឿងនោះត្រូវបានធ្វើការប្រគល់ទៅអោយស្ត្រីវ័យចំណាស់ជាជនរងគ្រោះវិញ ចំណែកឯក្រុមជនសង្ស័យទាំង២នាក់ និងម៉ូតូម៉ាក Let’s ដែលជិះធ្វើសកម្មភាពក៏បាននាំមកកាន់នគរបាលប៉ុស្តិ៍ទួលទំពូងទី២ដើម្បីធ្វើកំណត់ហេតុ និង បញ្ជូនទៅកាន់អធិការដ្ឋានខណ្ឌចំការមនចាត់់ការទៅតាមផ្លូវច្បាប់ជាបន្តទៀតផងដែរ ៕