ភ្ញាក់ផ្អើលខ្លាំង ក្រោយពីអ្នកលេងបណ្តាញសង្គមហ្វេសប៊ុកម្នាក់បានទម្លាយអំពីរូបថតរបស់តារាហូលីវូដដ៏ល្បីល្បាញអ្នកនាង Angelina Jolie

ខេត្តសៀមរាប ៖ មុននេះមានការភ្ញាក់ផ្អើលខ្លាំងក្រោយពីអ្នកលេងបណ្តាញសង្គមហ្វេសប៊ុកម្នាក់បានទម្លាយអំពីរូបថតរបស់តារាហូលីវូដដ៏ល្បីល្បាញអ្នកនាង Angelina Jolie លេចវត្តមាននៅក្នុងប្រទេសកម្ពុជានៅលើទឹកដីនៃតំបន់អង្គរខេត្តសៀមរាបថែមទៀតផង។ ទំព័រហ្វេសប៊ុកមួយបានសរសេរពីលើរូបថា «ស្ងាត់ៗ តារាហូលីវូដ អ្នកនាង Angelina Jolie អញ្ជើញមកទស្សនាប្រាសាទអង្គរ ក្នុងខេត្តសៀមរាប»។

ក្រៅពីបង្ហាញដំណើរកម្សាន្តយ៉ាងសប្បាយរីករាយនោះ ក្នុងរូបភាពក្រៅពីតារាសម្ដែងរូបនេះក៏ឃើញមានវត្តមានអ្នកស្រី អ៊ឹង លួង ដែលជាមិត្តល្អ ព្រមទាំងអាជ្ញាធរនៃតំបន់អង្គរមួយចំនួនផងដែរ។អ្នកលេងបណ្តាញសង្គមជាច្រើនបានសួរទៅកាន់ម្ចាស់គណនីហ្វេសប៊ុកនោះថាតើ Angelina មកពេលណា? ទើបម្ចាស់ផេកបញ្ជាក់ថា កាលពីម្សិលមិញនេះតែម្តង។ បន្ថែមពីលើនេះក៏មានអ្នកលើកឡើងបន្ថែមដែរថា Angelina មកចូលរួមមង្គលការគេកាលពីប៉ុន្មានថ្ងៃមុននេះ។

ជាក់ស្ដែងក៏នៅឃើញមានរូបភាពជាច្រើនទៀត ដែលបានថតជាប់នូវសកម្មភាពនៃដំណើរកម្សាន្តរបស់នាងចេញពីភ្ញៀវទេសចរដែលបានទៅកម្សាន្តនៅទីនោះ។ យ៉ាងណាមិញ គេនៅមិនទាន់ដឹងច្បាស់ពីមូលហេតុនៃការមកកាន់ប្រទេសកម្ពុជារបស់តារាហូលីវូដរូបនេះទេ ខណៈគេហទំព័រហ្វេសប៊ុកដែលមានឈ្មោះថា Angelina Jolie / Angie នៅថ្ងៃទី២២ ខែកុម្ភៈ ឆ្នាំ ២០២២នេះក៏បានបង្ហោះរូបថត៣សន្លឹកដែលបានបង្ហាញថានាងពិតជាបានធ្វើដំណើរកម្សាន្តនៅតំបន់អង្គរខេត្តសៀមរាបផងដែរដោយភ្ជាប់ដោយសំណេរថា គាត់កំពុងនៅអង្គរវត្តនៃប្រទេសកម្ពុជា ក្នុងនោះពលរដ្ឋកម្ពុជាជាច្រើនរូបក៏បានទាំងបង្ហាញអារម្មណ៍រីករាយស្វាគមន៍ក្នុងដំណើរមកដល់របស់តារាស្រីល្បីឈ្មោះ រូបនេះជាថ្មីនៅកម្ពុជា។ គេនៅមិនទាន់ដឹងនៅឡើយទេថា តើដំណើរមកដល់របស់លោកស្រីស្ថិតក្នុងដំណើរកម្សាន្តឬកិច្ចការណាឡើយ៕