ឧបនាយករដ្ឋមន្ត្រី ស សុខា អញ្ជើញសម្ពោធដាក់ឱ្យប្រើប្រាស់ជាផ្លូវការ នូវអគារ១ខ្នង កម្ពស់២ជាន់ ស្មើ១៤បន្ទប់ នៅស្នងការដ្ឋាននគរបាលខេត្តកំពង់ចាម

(កំពង់ចាម)៖ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្រ្តីក្រសួងមហាផ្ទៃ នៅព្រឹកថ្ងៃទី០២ ខែមេសា ឆ្នាំ២០២៥ អញ្ជើញសម្ពោធដាក់ឱ្យប្រើប្រាស់ជាផ្លូវការនូវអគារ១ខ្នង កម្ពស់២ជាន់ ស្មើ១៤បន្ទប់ នៅស្នងការដ្ឋាននគរបាលខេត្តកំពង់ចាម។

ឯកឧត្តម អភិសន្តិបណ្ឌិត ស សុខា ថ្លែងកោតសរសើរដល់គណៈបញ្ជាការឯកភាពខេត្តក៏ដូចជា កងកម្លាំងនគរបាលនៃស្នងការនគរបាលខេត្តកំពង់ចាមដែលបានលះបង់អស់កម្លាំងកាយចិត្តក្នុងការការពារសន្តិសុខសណ្ដាប់ធ្នាប់សាធារណៈជូនដល់ប្រជាពលរដ្ឋជាពិសេសការពារនូវសមិទ្ធផលសម្រេចបានគ្រប់ភារកិច្ចដែលថ្នាក់ដឹកនាំបានប្រគល់ជូន។

យកឱកាសនោះឯកឧត្តមអភិសន្តិបណ្ឌិតក៏បានណែនាំគោលការណ៍មួយចំនួនដើម្បីឲ្យស្នងការដ្ឋាននគរបាលខេត្តកំពង់ចាមអនុវត្តការងារបន្តរួមមាន៖

ទី១. បន្តថែរក្សាសន្តិសុខសណ្ដាប់ធ្នាប់សាធារណៈជូនប្រជាពលរដ្ឋក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ឆ្នាំ២០២៥។

ទី២.ត្រូវចូលរួមសហការពីតួអង្គសំខាន់ៗទាំងអស់ដាក់ចេញវិធានការបង្ការ និងទប់ស្កាត់បញ្ហាក្មេងទំនើង និងក្រុមឆក់ឱកាសជាពិសេសអំឡុងពេលចូលថ្មីប្រពៃណីជាតិខ្មែរខាងមុខនេះ។

ទី៣.បន្តបង្ក្រាបល្បែងសុីសងខុសច្បាប់នៅតាមមូលដ្ឋានឱ្យបានជាប់ជាប្រចាំ។

ទី៤. បន្តសហការជាមួយកងកម្លាំងប្រដាប់ធ្វេីយ៉ាងណាលុបបំបាត់ឱ្យបាននូវបញ្ហាគ្រឿងញៀន។

ទី៥. បម្រេីសេវាសាធារណៈជូនពលរដ្ឋឱ្យបានល្អ និងបន្តការអនុវត្តន៍គោលនយោបាយរបស់រាជរដ្ឋាភិបាលឱ្យតាមភូមិ-ឃុំ-សង្កាត់មានសុវត្ថិភាព៕