ក្មេងទំនើងឈ្លោះវាយតប់គ្នាក្នុងហាងកាហ្វេត្រូវបានកងរាជអាវុធហត្ថខេត្តកំពង់ចាមបង្ក្រាបឃាត់ខ្លួន៣នាក់

(កំពង់ចាម)៖ កម្លាំងកងរាជអាវុធហត្ថខេត្តកំពង់ចាម នៅថ្ងៃទី៣០ ខែមករា ឆ្នាំ២០២៥ បានបង្ក្រាបក្មេងទំនើងមួយក្រុមឃាត់ខ្លួនបានបីនាក់ ឈ្លោះវាតប់គ្នានៅចំណុចហាងកាហ្វេ ថេសធី (KT) ជិតផ្សារ៧មករា ស្ថិតនៅភូមិរកាលើ សង្កាត់សំបួរមាស ក្រុងកំពង់ចាម។

សមត្ថកិច្ចកងរាជអាវុធហត្ថបានឱ្យដឹងថា កិច្ចប្រតិបត្តិការបង្រ្កាបករណីក្មេងទំនើង (ហិង្សាដោយចេតនា) ធ្វើឡើងកាលពីយប់ថ្ងៃកើតហេតុ ដោយកម្លាំងជំនាញកងរាជអាវុធហត្ថខេត្តកំពង់ចាមបានចុះបង្រ្កាបករណីក្មេងទំនើងកំពុងវាយគ្នានៅចំណុចកើតហេតុដូចខាងលើ និងឈានទៅឃាត់ខ្លួនជនសង្ស័យ ០៣នាក់។

ក្នុងការបង្ក្រាបនេះសមត្ថកិច្ចអាវុធហត្ថដកហូតវត្ថុកាងរួមមាន: ម៉ូតូ០១គ្រឿង suzuki next ពណ៌ខៀវលាយស ស៊េរី 2024 ពាក់ស្លាកលេខត្បូងឃ្មុំ 1M9590។ បច្ចុប្បន្នជនសង្ស័យនិងវត្ថុតាងត្រូវបានបញ្ជូនមកបញ្ជាការដ្ឋានកងរាជអាវុធហត្ថខេត្តកំពង់ចាមដើម្បីចាត់ការតាមនីតិវិធី។