អភិបាលរងខេត្តព្រះសីហនុ បានអញ្ជើញជាអធិបតីក្នុងពិធីបិទ វេទិកាជួបជុំ CEOក្រោមប្រធានបទ «ជីវិតជា CEO»
នារសៀលថ្ងៃទី២៧ ខែមីនា ឆ្នាំ២០២៣ លោក ឡុង ឌីម៉ង់ អភិបាលរងខេត្តព្រះសីហនុ បានអញ្ជើញជាអធិបតីក្នុងពិធីបិទ វេទិកាជួបជុំ CEO នៅខេត្តព្រះសីហនុ ក្រោមប្រធានបទ «ជីវិតជា CEO» ដែលបានរៀបចំឡើងដោយ ក្រុមហ៊ុន រដ្ឋា លីឌើរស៊ីប ឯ.ក (Rotha Leadership) នៅសណ្ឋាគារ ឆ្នេរសុខា។
លោកអភិបាលរងបាន លើកឡើងថា ជីវិតជាCEO ដែលដឹកនាំក្រុមហ៊ុន និងជីវិតមន្ត្រីបំរើប្រជាពលរដ្ឋគឺមិនខុសគ្នាទេ ពោលគឺយើងត្រូវការជាចាំបាច់នូវសិល្បៈនៃការដឹកនាំ ដើម្បីភាពរីកចំរើនប្រកបដោយចីរភាព និងចេះស្វែងរកឱកាសនៅក្នុងវិបត្តិ។ ជាក់ស្តែង យើងអាចមើលឃើញតាមរយៈការឆ្លៀតឱកាសសាងសង់ហេដ្ឋារចនាសម្ព័ន្ធឱ្យបានរួចរាល់ក្នុងវិបត្តិកូវីដ-១៩ ដើម្បីសម្រួលដល់ជីវភាពប្រជាពលរដ្ឋ និងត្រៀមលក្ខណៈទទួលយកការវិនិយោគនាពេលអនាគតដ៏ខ្លីខាងមុខ។
លោក អភិបាលរង បានបន្ថែមទៀតថា វេទិកានេះគឺពិតជាបានបណ្តុះស្មារតី មនសិកា ឧត្តមគតិព្រមទាំងបង្កើតបាននូវចំណងមិត្តភាព សាមគ្គីភាព និងកិច្ចសហការល្អ សម្រាប់ពេលបច្ចុប្បន្ន និងតទៅអនាគត ព្រមទាំងបានផ្តល់ឱកាសដល់សហគ្រិន ម្ចាស់អាជីវកម្ម ចែករំលែកនូវចំណេះដឹង ជំនាញ បទពិសោធន៍ និងការអនុវត្តល្អៗ ដើម្បីរួមគ្នាពង្រឹងពង្រីកសមត្ថភាព និងសក្តានុពល។ លើសពីនេះ លោកបានបង្ហាញការគាំទ្រ និងលើកទឹកចិត្តឱ្យក្រុមហ៊ុនបន្តបេសកកម្មនេះ ឱ្យបានកាន់តែ ទូលំទូលាយ និងស៊ីជម្រៅបន្ថែមទៀត។
