សង្វៀនបញ្ជល់មាន់និងល្បែងស៊ីសងខុសច្បាប់គ្រប់ប្រភេទចាប់ផ្ដើមបើកដំណើរការឡើងវិញក្នុងស្រុកឱរ៉ាល់អ្នកចូលលេងសុទ្ធសឹងអ្នកមានលុយនិងអ្នកមានអំណាច

តាមប្រភពព័ត៌មានពីអ្នកញៀនល្បែងបានឲ្យដឹងថា ៖ ក្រោយពីភ្ជុំបិណ្ឌរួចម្ចាស់សង្វៀនបញ្ជល់មាន់និងល្បែងស៊ីសងគ្រប់ប្រភេទចាប់បើកដំណើរការឡើងវិញយ៉ាងគគ្រឹកគគ្រេងនិងមានមនុស្សចូលលេងជាច្រើននាក់សុទ្ធសឹងតែជាមានលុយមានអំណាចនិងមានឡានស៊េរីទំនើបៗជាច្រើនគ្រឿងបានចូលទៅលេងដោយសេរីហើយម្ចាស់សង្វៀនបានអួតអាងប្រាប់អ្នកញៀនល្បែងថាខ្លួនបានរត់ការអស់ហើយចាប់ពីថ្នាក់ក្រោមរហូតដល់ថ្នាក់លើរួចរាល់ហើយទីតាំងដែលពួកគេបើកលេងនោះស្ថិតនៅចំណុចគីឡូលេខ 51ទៅ 59 និងលេងចល័តក្នុងស្រុកឱរ៉ាល់ ថ្ងៃនេះលេងម្ដុំនេះថ្ងៃនោះលេងម្ដុំនោះពួកគេមិនលេងនៅហ្នឹងកន្លែងទេជួនកាលចល័តបីថ្ងៃម្ដងក៏មាន។ ដោយឡែកម្ចាស់សង្វៀនជល់មាន់នោះដែលគេអះអាងថាជាមន្ត្រីយោធាតំបន់ភូមិភាគ 3 មានសក្ដិប្រាំងហើយបច្ចុប្បន្ននេះមន្ត្រីជាយោធានៅភូមិភាគ 3 នោះបានលក់កន្លែងសង្វៀនបញ្ជល់មាន់និងល្បែងស៊ីសងខុសច្បាប់គ្រប់ប្រភេទនេះឱ្យទៅអ្នកមានម្នាក់ក្នុងតម្លៃមួយថ្ងៃ4 លានរៀលទៅ 6លានរៀល(គិតក្នុងមួយថ្ងៃ)។

ទោះបីជាប្រមុខរដ្ឋាភិបាល សម្តេចអគ្គមហាសេនាបតីតេជោ ហ៊ុន សែន បានដាក់ចេញនូវបម្រាម ដើម្បីទប់ស្កាត់ការរីករាលដាលជំងឺកូវីដ១៩ ជាពិសេសជំងឺកូវីដ១៩ បំលែងថ្មី(Delta)ដ៏កាចសាហាវយ៉ាងណាក្តី។ ជាពិសេសក្រុមមនុស្សញៀនល្បែងស៊ីសងនៅតែប្រមូលផ្តុំគ្នាដដែលមិនគោរពទាល់តែសោះ។ ដោយសារតែលោកឧត្តមសេនីយ៍ត្រី គុង គឿង និងលោក វរសេនីយ៍ទោ ជឿន ថេន បើកឱ្យអ្នកញៀនល្បែងស៊ីសងចូលលេងដោយសេរីមិនខ្លាចញញើតច្បាប់សោះឡើយ។ ប្រភពសុំមិនបញ្ចេញឈ្មោះបានឲ្យដឹងថា ៖ មេល្បែងស៊ីសងទាំង២នាក់នេះ បានរត់ការចំណាយលុយតាំងពីថ្នាក់ក្រោមរហូតដល់ថ្នាក់លើព្រមទាំងមន្ត្រី មានអំណាចនៅក្នុងខេត្តកំពង់ស្ពឺតែម្ដង។

ទីតាំងសង្វៀនបញ្ជល់មាន់និងល្បែងស៊ីសងគ្រប់ប្រភេទស្ថិតក្នុងភូមិតាក្រាំង ឃុំតាសាល ស្រុកឱរ៉ាល់និងមួយទីតាំងទៀតនៅតាមបណ្តោយផ្លូវជាតិលេខ៤៤ ចន្លោះបង្គោលគីឡូម៉ែត្រលេខ៥៨ ទៅបង្គោលគីឡូម៉ែត្រលេខ៥៩ ស្ថិតនៅក្នុងភូមិដំបងវេញ ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ នៅក្នុងចំការឬស្សីដែលជាកន្លែងស្តុកឈើប្រណីតរបស់មន្ត្រីមានអំណាចក្នុងតំបន់ភូមិភាគ 3 តែម្ដង ។

ប្រភពព័ត៌មានបានបង្ហើបឱ្យដឹងថា ៖ ល្បែងស៊ីសងរបស់មន្ត្រីយោធាទាំង២នាក់នេះ បើកដំណើរការដោយរលូនប្រសិនបើសមត្ថកិច្ចជំនាញមកបង្ក្រាបម្ដងៗបង្រ្កាបបានតែទ្រុងមាន់និងមាន់តែប៉ុណ្ណោះប៉ុន្តែអ្នកញៀនល្បែងនិងអ្នកបើកល្បែងស៊ីសងរត់រួចពីសំណាញ់ច្បាប់រហូតហើយការបើកសង្វៀនបញ្ជល់មាន់នេះគឺចាប់បើក ពីថ្ងៃ ពុធ ព្រហស្បតិ៍ សុក្រនិង សៅរ៍ និងអាទិត្យ ស្ថិតនៅក្នុងភូមិតាក្រាំង ឃុំតាសាល ស្រុកឱរ៉ាល់ និងចំពោះថ្ងៃអាទិត្យវិញ ល្បែងស៊ីសងគ្រប់ប្រភេទនេះបានលើកទៅលេងក្នុងចំការឬស្សី តាមបណ្តោយផ្លូវជាតិលេខ៤៤ ត្រង់ចន្លោះបង្គោលគីឡូម៉ែត្រលេខ៥៨ទៅលេខ៥៩ ក្នុងភូមិដំបងវេញ ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ ដែលអ្នកញៀនល្បែងស៊ីសងគ្រប់ប្រភេទនេះ មកតាមបណ្តាខេត្តនានានិងមកពីរាជធានីភ្នំពេញក៏មានដែរ ម្នាក់ៗជិះរថយន្តស៊េរីទំនើបៗហើយល្បែងបញ្ជល់មាន់ភ្នាល់ដាក់លុយចាប់ពី ២ម៉ឺនដុល្លារឡើងទៅរហូតដល់ទៅ១០ម៉ឺនដុល្លារសហរដ្ឋអាមេរិកអាចមានច្រើនជាងនេះលេខក៏មានដែរ។

ក្រៅពីនោះក៏នៅមានល្បែងកន្ទុយលេខ ល្បែងយូគីនិងល្បែងបៀ អាប៉ោង ថែមទៀតផង។ចំពោះម្ចាស់បនល្បែង បើទោះបីជាអ្នកញៀនល្បែងភ្នាល់ដាក់ប៉ុន្មានចាញ់ឈ្នះប៉ុន្មានក៏ដោយ ម្ចាស់បនល្បែងតម្រូវឱ្យបង់ក្នុង១ថ្ងៃ 4លានរៀលទៅ 6 រៀលទៀតជាកំហិតដើម្បីការពារសុវត្ថិភាពជូនអ្នកញៀនល្បែងស៊ីសងទាំងអស់នោះ។

ប្រសិនបើបងប្អូនចង់លេងល្បែងស៊ីសងគ្រប់ប្រភេទហើយសុខសុវត្ថិភាពនោះ បងប្អូនអាចចូលទៅលេងបានដោយសេរី។ បើយើងធ្វើដំណើរចេញពីទីរួមខេត្តកំពង់ស្ពឺតាមផ្លូវជាតិលេខ៤ខាងលិចផ្សារកំពង់ស្ពឺនិងទៅដល់មានភ្លើងស្តុបមួយដែលគេហៅថាស្តុបច្បារមនរួចយើងបត់ទៅខាងស្តាំដៃតាមផ្លូវជាតិលេខ៤៤ ប្រហែលជាង១គីឡូម៉ែត្រ យើងបត់ឆ្វេងដៃ លើផ្លូវជាតិលេខ៤៤ដដែល ឆ្ពោះទៅស្រុកឱរ៉ាល់ ដោយឆ្លងកាត់ក្រុងច្បារមន ឆ្លងកាត់ព្រំប្រទល់ស្រុកសំរោងទង បើកបរបានជាង២០គីឡូម៉ែត្រ ទៅដល់ព្រំប្រទល់ ស្រុកឱរ៉ាល់ ហួសទៅទិសខាងលិចបង្គោលគីឡូម៉ែត្រលេខ៥០ទៅដល់រង្វង់មូល ផ្សារកន្តួត មានរូបដំរីតំណាង យើងបន្តដំណើរទៅទិសខាងលិចប្រមាណ៦ទៅ៧គីឡូម៉ែត្រ ឆ្លងកាត់ស្ពានដែកជាកន្លែងបនល្បែងដ៏ធំប្រចាំស្រុកឱរ៉ាល់ នៃខេត្តកំពង់ស្ពឺ មន្ត្រីយោធា២នាក់ មានអំណាចដ៏មហិមាហ៊ានបើកលេងមិនខ្លាចញញើតច្បាប់នោះឡើយ។

ប្រភពព័ត៌មានបានបង្ហើបឱ្យដឹងទៀតថា គ្រាន់តែការបង្ក្រាបមិនបានប៉ុន្មានថ្ងៃផងម្ចាស់សង្វៀនបញ្ជល់មាន់ស្ថិតនៅចំណុចខាងលើ ក្នុងឃុំតាសាល ស្រុកឱរ៉ាល់ ខេត្តកំពង់ស្ពឺ បើកលេងល្បែងយ៉ាងសប្បាយដដែលដោយមិនខ្វល់ពីអនុសាសន៍របស់សម្ដេចតេជោ ហ៊ុន សែន ជាពិសេសបំរាមរបស់រដ្ឋបាលខេត្តកំពង់ស្ពឺនោះទេ៕