ទីតាំងល្បែងតាមអនឡាញនៅភូមិដូនដី ស្រុកព្រៃឈរ ខេត្តកំពង់ចាមកំពុងបើកលេងយ៉ាងគគ្រឹកគគ្រេងគ្មានសមត្ថកិច្ចបង្ក្រាប

ខេត្តកំពង់ចាម: ជារៀងរាល់ថ្ងៃគេសង្កេតឃើញថាមានហាងកាហ្វេមួយកន្លែងស្ថិតនៅភូមិដូនដី ស្រុកព្រៃឈរ ខេត្តកំពង់ចាម កំពុងតែប្រមូលផ្តុំគ្នាលេងល្បែងភ្នាល់តាមអនឡាញយ៉ាងអាណាធិបតេយ្យដោយមិនខ្លាចញញើតជំងឺឆ្លងទាល់តែសោះរីឯសមត្ថកិច្ចវិញហាក់មើលមិនឃើញដែលជាហេតុនាំម្ចាស់ហាងកាហ្វេខាងលើកាន់តែបានដៃ។

ជាក់ស្តែងនៅល្ងាចថ្ងៃទី១៤ ខែតុលា ឆ្នាំ២០២១នេះក្រុមការងារសារព័ត៌មានបានចុះទៅផ្តិតយករូបភាពដើម្បីធ្វើការផ្សព្វផ្សាយជូនដល់មហាជនជាពិសេសសមត្ថកិច្ចក្នុងមូលដ្ឋានអោយបានជ្រាបនឹងដើម្បីបង្ក្រាបទប់ស្កាត់ដល់ទីតាំងល្បែងខាងលើដើម្បីរក្សាការពារសេចក្តីសុខ សុវត្ថិភាពនិងភូមិ ឃុំមានសុវត្ថិភាពទាំង៧ចំណុច។

ក្នុងនោះដែរក៏មានការលើកឡើងពីសំណាក់ប្រជាពលរដ្ឋដែលរស់នៅក្នុងតំបន់ខាងលើថា ៖ ជារៀងរាល់ថ្ងៃគាត់ឃើញហាងកាហ្វេមួយកន្លែងខាងលើនេះបើកលេងល្បែងតាមអនឡាញយូរណាស់មកហើយតែមិនដែលឃើញមានសមត្ថកិច្ចណាចុះមកបង្ក្រាបឡើយដែលជាហេតុនាំអោយក្រុមអ្នកញៀនល្បែងទាំងនោះកាន់តែបានដៃនិងផ្គើនចំពោះបំរាមរបស់ក្រសួងសុខាភិបាលដែលហាមមិនអោយមានការជួបជុំ។

ដូច្នេះសូមសំណូមពរដល់សមត្ថកិច្ចមូលដ្ឋានជាពិសេសលោកអធិការស្រុកព្រៃឈរសូមមានវិធានការបង្ក្រាបនិងទប់ស្កាត់ដល់ក្រុមអ្នកញៀនល្បែងទាំងនេះផងជាពិសេសម្ចាស់ហាងកាហ្វេខាងលើនេះផ្ទាល់តែម្ដងដើម្បីរក្សាអោយបាននូវសន្តិសុខភូមិ ឃុំមានសុវត្ថិភាពទាំង៧ចំណុច៕