លោកស្រី ប៉ាង ដានី អញ្ជើញជាអធិបតីក្នុងពិធីចែកចង្រ្កានសន្សំសំចៃថាមពលជូនប្រជាពលរដ្ឋ ៣០០គ្រួសារ

(កំពង់ចាម)៖ លោកស្រី ប៉ាង ដានី អភិបាលរងខេត្តកំពង់ចាម និងជាប្រធានសាខាសមាគមនារីកម្ពុជាដើម្បីសន្តិភាពនិងអភិវឌ្ឍន៍ខេត្តតំណាងលោកជំទាវ ញូង ចរិយា អ៊ុន ចាន់ដា ប្រធានកិត្តិយសសាខាសមាគម នៅព្រឹកថ្ងៃទី២៤ ខែមីនា ឆ្នាំ ២០២៥ បានអញ្ជើញជាអធិបតីក្នុងពិធីចែកចង្រ្កានសន្សំសំចៃថាមពលជូនប្រជាពលរដ្ឋនៅក្នុងឃុំអូរស្វាយ ស្រុកកំពង់សៀម ខេត្តកំពង់ចាម។

តាមមន្ត្រីរដ្ឋបាលស្រុកកំពង់សៀមបានឱ្យដឹងថា ក្នុងពិធីចែកចង្រ្កានសន្សំសំចៃថាមពលជូនប្រជាពលរដ្ឋប្រព្រឹត្តនៅវត្តខែលជ័យក្នុងឃុំអូរស្វាយ ផ្ដល់ជូនប្រជាពលរដ្ឋចំនួន ៣០០គ្រួសារក្នុងនោះមានជនពិការចំនួន៩នាក់ ស្រី ៥នាក់។

មន្ត្រីដដែលបានបញ្ជាក់ថា ក្នុងពិធីនោះដែរមានការអញ្ជើញចូលរួមពី លោក ជឹង ម៉េងហុង អភិបាលរងស្រុក តំណាងលោក ទុន ណេត អភិបាលស្រុកកំពង់សៀម ក្រុមការងារសមាគមនារីថ្នាក់ខេត្ត លោកស្រី ហ៊ិន ម៉ាលីស នាយករងរដ្ឋបាលសាលាស្រុក និងជាអនុប្រធានអនុសាខាសមាគមនារីស្រុក និងសមាជិកា កម្លាំងទាំងបី លោក-លោកស្រី សមាជិកក្រុមប្រឹក្សាឃុំ លោកមេភូមិ អនុភូមិ សមាជិក ប៉ុស្តិ៍រដ្ឋបាល និងប្រជាពលរដ្ឋសរុប ៣២៥នាក់ ស្រី២៨៥នាក់។