សម្ពោធដាក់ប្រើប្រាស់សមិទ្ធផលនានាក្នុងវត្តរស្មីសង្កែដែលចំណាយការសាងសង់អស់ថវិកាប្រមាណជិត ១០ម៉ឺនដុល្លារអាមេរិក

(កំពង់ចាម)៖ ឯកឧត្តម ខ្លូត ផន ប្រធានក្រុមប្រឹក្សាខេត្ត និង អភិបាលខេត្តកំពង់ចាម ឯកឧត្តម អ៊ុន ចាន់ដា នៅព្រឹកថ្ងៃទី២៣ ខែមីនា ឆ្នាំ ២០២៥ នេះ បានអញ្ជើញសម្ពោធដាក់ឱ្យប្រើប្រាស់ជាផ្លូវការនូវសមទ្ធិផលនានាក្នុងវត្តរស្មីសង្កែស្ថិតនៅក្នុងឃុំព្រៃឈរ ស្រុកព្រៃឈរ ដែលចំណាយថវិកាសាងសង់អស់ប្រមាណជាជិត ១០ម៉ឺនដុល្លារអាមេរិក។

ស្ថិតក្នុងឱកាសសំណេះសំណាលជាមួយបងប្អូនប្រជាពលរដ្ឋ ឯកឧត្តម អ៊ុន ចាន់ដា អភិបាលខេត្តកំពង់ចាមបានពាំនាំនូវប្រសាសន៍ផ្ដាំផ្ញើសួរសុខទុក្ខដល់បងប្អូនប្រជាពលរដ្ឋពីសំណាក់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

ឯកឧត្តមអភិបាលខេត្តបានមានប្រសាសន៍ឱ្យដឹងទៀតថា សមិទ្ធផលក្នុងវត្តរស្មីសង្កែដែលបានសម្ពោធនាពេលនេះមានដូចជាដំបូលព្រះវិហារ កុដមួយខ្នង និងស្រះទឹកដែលចំណាយថវិការសរុបប្រមាណជាជិត ១០ម៉ឺនដុល្លារអាមេរិក ។ លោកអភិបាលខេត្តក៏បានយកឱកាសនោះអបអរសាទរដែលវត្តរស្មីសង្កែទទួលបាននូវសមិទ្ធផលថ្មីៗ និងថ្លែងអំណរគុណដល់សប្បុរសជនទាំងឡាយដែលបានចូលរួមជាកុសលចូលជាបច្ច័យក្នុងការសាងសង់បង្ហើយនូវសមិទ្ធផលជាប្រវត្តិសាស្ត្រទាំងនេះនៅក្នុងស្រុកព្រៃឈររបស់យើង។

ឯកឧត្តមអភិបាលខេត្តក៏បានបញ្ជាក់ផងដែរថា កត្តាដែលនាំឱ្យមានការរីកចម្រើនទាំងវិស័យពុទ្ធចក្រ និងវិស័យអាណាចក្រមកដល់ពេលនេះគឺដោយសារប្រទេសជាតិយើងមានសុខសន្តិភាពនាំឱ្យប្រជាពលរដ្ឋយើងមានការងារធ្វើប្រកបមុខរបរទទួលទាន មានជីវភាពធូរធារហើយអាចមានលទ្ធភាពក្នុងការចូលរួមជាបច្ច័យដើម្បីកសាងអភិវឌ្ឍន៍ឱ្យកើតមានសមិទ្ធផលថ្មីៗជាបន្តបន្ទាប់៕