សាលាចំនួន ០៤ ក្នុងខេត្តព្រៃវែងទទួលបានការជ្រើសរើសជាសាលាគោលដៅក្នុងការអនុវត្តវិធានការគន្លឹះក្នុងវិស័យអប់រំ

(ព្រៃវែង)៖ ឯកឧត្តម ពេជ សោភ័ន ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានលេខាធិការដ្ឋាន គណៈកម្មាធិការជាតិជំរុញការអនុវត្តវិធានការគន្លឹះក្នុងវិស័យអប់រំ របស់រាជរដ្ឋាភិបាលនីតិកាលទី៧ នៃរដ្ឋសភា (គ.វ.អ) បានមានប្រសាសន៍លើកឡើងថា មូលដ្ឋានគ្រឹះនៃវិស័យអប់រំបានដើរតួនាទីយ៉ាងសំខាន់ក្នុងការអភិវឌ្ឍន៍ប្រទេសជាតិឱ្យមានការរីកចម្រើនទាំងអស់នេះយើងត្រូវអនុវត្តនូវវិធានការគន្លឹះក្នុងវិស័យអប់រំរបស់រាជរដ្ឋាភិបាលនីតិកាលទី ៧ នៃរដ្ឋសភា ដើម្បីគាំទ្រសាលារៀនគោលដៅធ្វើយ៉ាងណាដើម្បីឱ្យវិស័យអប់រំមួយនេះកាន់តែមានការរីកចម្រើនទ្វេដងថែមទៀតនៅក្នុងប្រទេសកម្ពុជា។ ដោយការលើកឡើងបែបនេះនៅក្នុងឱកាសដែលឯកឧត្តមបានអញ្ជើញជាអធិបតីក្នុងពិធីវគ្គគាំទ្រសាលារៀនគោលដៅក្រោមការអនុវត្តវិធានការគន្លឹះក្នុងវិស័យអប់រំរបស់រាជរដ្ឋាភិបាលនីតិកាលទី ៧ នៃរដ្ឋសភា (គ.វ.អ) នៅព្រឹកថ្ងៃទី២០ ខែឧសភា ឆ្នាំ២០២៤។

ក្នុងនោះសាលាដែលត្រូវបានជ្រើសរើសក្នុងខេត្តព្រៃវែងមានចំនួន ៤សាលា គឺសាលា បឋមសិក្សា សម្តេចតេជោ ហ៊ុន សែន បុញ្ញាខេត្តារាម ក្រុងព្រៃវែង, សាលាបឋមសិក្សាតាកោ ក្រុងព្រៃវែង, សាលាបឋមសិក្សាពាមរក៍ ស្រុកពាមរក៍ និងសាលាបឋមសិក្សាថ្នល់ជ័យ ស្រុកស្វាយអន្ទរ។

ឯកឧត្ដម ទេសរដ្ឋមន្រ្តី មានប្រសាសន៍បន្ថែមថា ដើម្បីឆ្លើយតបទៅនឹងយុទ្ធសាស្ត្របញ្ចកោណដំណាក់ទី១ របស់រាជរដ្ឋាភិបាលកម្ពុជា នីតិកាលទី៧ នៃរដ្ឋសភា បានចាត់ទុកការអភិវឌ្ឍមូលធនមនុស្សជាអាទិភាពគន្លឹះទី១ និងអនុសាសន៍គន្លឹះរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា រដ្ឋបាលខេត្តព្រៃវែង ដែលមានមន្ទីរអប់រំ យុវជន និងកីឡា ជាសេនាធិការបានរៀបចំផែនការយុទ្ធសាស្ត្រវិស័យអប់រំ៥ឆ្នាំរបស់ខេត្តស្របតាមផែនការយុទ្ធសាស្ត្ររបស់ក្រសួងអប់រំ យុវជន និង កីឡា និងដាក់ចេញនូវវិធានការលើកកម្ពស់គុណភាព និងភាពឆ្លើយតបរបស់សេវាអប់រំតាមរយៈការលើកកម្ពស់វិជ្ជាជីវៈ គ្រូបង្រៀន និងលើកទឹកចិត្តព្រមទាំងបង្កើនស្វ័យភាព គណនេយ្យភាព និងភាពជាអ្នកដឹកនាំក្នុងការគ្រប់គ្រង សេវាអប់រំគ្រប់លំដាប់ថ្នាក់ សំដៅសម្រេចគោលដៅការអភិវឌ្ឍប្រកបដោយចីរភាពឆ្នាំ២០៣០ និងដើម្បីសម្រេចបាននូវយុទ្ធសាស្ត្រកំណែទម្រង់វិស័យអប់រំ ៩ចំណុច ឆ្លើយតបបរិវត្តកម្មអប់រំ៖
១-ការបើកសាលារៀនឡើងវិញប្រកបដោយ សុវត្ថិភាពការស្តារឡើងវិញនូវការរៀនសូត្រ និងបន្តការសិក្សារបស់សិស្ស។
២-កំណែទម្រង់សាលារៀន។
៣-ការអភិវឌ្ឍគ្រូបង្រៀនឱ្យមានគុណភាពខ្ពស់តាមរយៈកំណែទម្រង់គ្រឹះស្ថានបណ្តុះបណ្តាលគ្រូ។
៤-ការអប់រំឌីជីថល
៥-ការអប់រំ វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា។
៦-ការអភិវឌ្ឍជំនាញសតវត្សទី២១របស់យុវជន។
៧-ការបង្កើត មជ្ឈមណ្ឌលឧត្តមភាពនៅកម្រិតឧត្តមសិក្សា។
៨-ការពង្រឹងសមត្ថភាបស្ថាប័ន និងការកសាងប្រព័ន្ធ។
៩-ការអភិឌ្ឍ ការអប់រំកាយ និងកីឡា ។

ឯកឧត្ដម សួន សុម៉ាលីន អភិបាលខេត្តបានមានប្រសាសន៍លើកឡើងថា លើការងារអប់រំ យុវជន និងកីឡា ខេត្តព្រៃវែង មានសាលារៀនសរុបទូទាំងខេត្តចំនួន ១.០៩២កន្លែង មានគ្រូសរុប ៧.៦១២ នាក់ ស្រី ៤.៦៥៦ នាក់ មានសិស្សសរុបចំនួន ២៥១.៤៤៦នាក់ ស្រី១២៣.១១៣នាក់ ក្នុងនោះ៖ មត្តេយ្យរដ្ឋ ៤១៦កន្លែង និងមត្តេយ្យសហគមន៍ ៣៥៥កន្លែង (មត្តេយ្យស្តង់ដា៨៩កន្លែង), សាលាបឋមសិក្សាចំនួន ៥៥១កន្លែង (សាលាឯកជន៣សាលា), អនុវិទ្យាល័យ៩២សាលា វិទ្យាល័យ៣៣សាលា និងវិទ្យាល័យឯកជន១សាលា។

ឯកឧត្ដមអភិបាលខេត្តបន្តថា តាមរយៈលេខាធិការដ្ឋាន គ.វ.អ ក្នុងការអនុវត្តសកម្មភាពជ្រើសរើសសាលាបឋមសិក្សាគោលដៅនៅដំណាក់កាលដំបូង ខេត្តព្រៃវែង ជាខេត្តមួយដែលមានសំណាងរួមជាមួយ៨រាជធានី-ខេត្ត ដែលទទួលបានការជ្រើសរើសក្នុងការអនុវត្តវិធានការគន្លឹះក្នុងវិស័យអប់រំរបស់រាជរដ្ឋាភិបាលនីតិកាលទី៧ នៃរដ្ឋសភាដើម្បីលើកកម្ពស់គុណភាពអប់រំ តាមរយៈការពង្រឹងគុណភាពសាលារដ្ឋចាប់ពីថ្នាក់មត្តេយ្យដល់មធ្យមសិក្សាដើម្បីផលិតមូលធនមនុស្សប្រកបដោយចំណេះដឹង និងជំនាញ សីលធម៌ល្អ ឥរិយាបថល្អ និងសមត្ថភាពការងារខ្ពស់ព្រមទាំងឆ្លើយតបទៅនឹងតម្រូវការជាក់ស្តែងរបស់ សង្គម សេដ្ឋកិច្ច និងទីផ្សារការងារ។

ឆ្លៀតក្នុងឱកាសនេះ ក្នុងនាមរដ្ឋបាលខេត្តព្រៃវែង សូមថ្លែងអំណរគុណយ៉ាងជ្រាលជ្រៅចំពោះថ្នាក់ដឹកនាំ និងមន្ត្រីជំនាញ នៃលេខាធិការដ្ឋាន គ.វ.អ ពិសេសឯកឧត្តម ពេជ សោភ័ន ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានលេខាធិការដ្ឋាន គ.វ.អ ដែលបានសម្រេចជ្រើសរើសខេត្តព្រៃវែងជាខេត្តគោលដៅ។ រដ្ឋបាលខេត្តនឹងខិតខំផ្តល់នូវកិច្ចសហការល្អដើម្បីការអនុវត្តយុទ្ធនាការចុះគាំទ្រសាលារៀនគោលដៅក្នុងខេត្តព្រៃវែងឱ្យទទួលបានជោគជ័យដើម្បីជាមូលដ្ឋានក្នុងការជ្រើសរើសសាលាគោលដៅបន្ថែមទៀតក្នុងខេត្តសម្រាប់ដំណាក់កាលបន្តបន្ទាប់៕