សូមស្វាគមន៍មកកាន់សង្វៀនជល់មាន់ដុះស្នឹមមួយកន្លែងក្នុងស្រុកបាទីខណៈអាជ្ញាធរហាក់ធ្វើមិនដឹងអីសោះ!
ខេត្តតាកែវ៖ សង្វៀនជល់មាន់ និងល្បែងបៀអាប៉ោងស៊ីសងគ្រប់ប្រភេទ បាននឹងកំពុងបើកដៃឲ្យលេងយ៉ាងគគ្រឹកគគ្រេង ចំណែកឯអាជ្ញាធរហាក់ធ្វើមិនដឹងមិនឮ ស្របពេលដែលរាជរដ្ឋាភិបាលចេញវិធានការយ៉ាងតឹងរឹង ហាមឃាត់មិនឲ្យមានការជួបជុំ ដែលអាចបង្កការឆ្លងជំងឺកូវីដ19។ ទីតាំងស្ថិតក្នុងភូមិទន្លេបាទី ឃុំជន្លង់ ស្រុកបាទី ខេត្តតាកែវ។
ប្រភពពីពួកអ្នកដែលញៀនល្បែងបានឲ្យដឹងថា៖ បុគ្គលម្នាក់ឈ្មោះ ដេត (ម្ចាស់សង្វៀន) បានបើកសង្វៀនបញ្ជល់មាន់ និងវង់បៀរ អាប៉ោង ទ្រង់ទ្រាយធំ ដែលកំពុងដំណើរការយ៉ាងរលូន នៅចំណុចចូលពីផ្លូវជាតិ ចម្ងាយមួយគីឡូម៉ែត្រដល់រមណីយដ្ឋានទន្លេបាទីរួចបត់ឆ្វេង ចូលតាមរបងឯកឧត្តម សុខ អាន ចម្ងាយ 3 គីគីឡូម៉ែតនៅក្នុងព្រៃ។
ប្រភពដដែលបានឲ្យដឹងថា÷ ម្យ៉ាងវិញទៀតបុគ្គលឈ្មោះ ដេត (ម្ចាស់សង្វៀន) បានអួតប្រាប់អតិថិជនរបស់ខ្លួនថា ពួកគេរត់ការបង់លុយឲ្យអាជ្ញាធររួចអស់ហើយ ដូច្នេះគ្មានមន្ត្រីអាជ្ញាធរ ឬ សមត្ថកិច្ចហ៊ានបង្ក្រាបនោះឡើយ។ ជាក់ស្តែង ប៉ូលីសប៉ុស្តិ៍នគរនគរបាលឃុំជន្លង់ និងអធិការនគរបាលស្រុកបាទី បានរក្សាភាពស្ងៀមស្ងាត់ ទុកឲ្យល្បែងស៊ីសងខុសច្បាប់ផ្តុំគ្នាលេងបានយ៉ាងរលូន។
ជាមួយគ្នានោះដែរ ពលរដ្ឋរិះគន់ថា បច្ចុប្បន្ន ក្នុងមូលដ្ឋានពួកគាត់ក្នុងភូមិទន្លេបាទី ឃុំជន្លង់ស្រុកបាទី មានអំពើចោរកម្ម អំពើហិង្សា ក្មេងទំនើងបងតូចបងធំ និង បទល្មើសផ្សេងៗ ឧស្សាហ៍កើតឡើងណាស់ ដែលបង្កឱ្យមានការភ័យខ្លាចព្រមទាំងប៉ះពាល់យ៉ាងខ្លាំងដល់សតិអារម្មណ៍របស់ប្រជាពលរដ្ឋក្នុងមូលដ្ឋានជាពិសេសសន្តិសុខភូមិ ឃុំ សុវត្ថិភាព។
អាស្រ័យហេតុនេះ ប្រជាពលរដ្ឋសូមអំពាវនាវដល់លោក សុខ សំណាង ស្នងការនគរបាលខេត្តតាកែវ មេត្តាត្រួតពិនិត្យទង្វើរបស់មន្ត្រីថ្នាក់ក្រោម និងចាត់វិធានការ ចុះបង្ក្រាបល្បែងស៊ីសងខុសច្បាប់ខាងលើនេះផង៕
