មេខ្លោងជួញដូរគ្រឿងញៀនដ៏ធំម្នាក់ ជាជនជាតិចិន រួមទាំងថ្នាំញៀនប្រមាណជិត៤០គីឡូក្រាម ត្រូវបានកម្លាំងនគរបាលជំនាញចាប់ខ្លួន
ភ្នំពេញ = មេខ្លោងជួញដូរគ្រឿងញៀនដ៏ធំម្នាក់ម្នាក់ ជាជនជាតិចិន រួមទាំងថ្នាំញៀនប្រមាណជិត៤០គីឡូក្រាម ដែលចរាចរណ៍នាំចូលមកកម្ពុជា ។
តាមសេចក្តីរាយការណ៍ថា ការបង្ក្រាបមេខ្លោងគ្រឿងញៀនខាងលើនេះបានធ្វើឡើងដោយនគរបាលនៃមន្ទីរប្រឆាំងគ្រឿងញៀន កាលពីយប់ថ្ងៃទី០២ ខែតុលា ឆ្នាំ២០១៩កន្លងទៅថ្មីៗនេះ នៅក្នុងខុនដូមួយកន្លែង ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។ បើទោះបីជាយ៉ាងណាក្តីសមត្ថកិច្ចនៅតែបន្តស្រាវជ្រាវរកមេក្លោងធំ និងបក្ខពួកទៀត ដើម្បីយកមកផ្តន្ទាទោសតាមច្បាប់ ។ នេះបើតាមមន្ត្រីជាន់ខ្ពស់ នៃអគ្គស្នងការនគរបាលជាតិ ថ្លែងប្រាប់បណ្តាញ pnctv online កាលពីរសៀល ថ្ងៃទី៣ ខែតុលា ឆ្នាំ២០១៩នេះ ។
មន្ត្រីរូបនេះបន្តថា ប្រត្តិប័ត្តិការបង្ក្រាមេខ្លោងគ្រឿងញៀនខាងលើ ក្រោមការដឹកនាំដ៏ខ្ពង់ខ្ពស់ពីសំណាក់នាយឧត្ដមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងមានការចង្អុលបង្ហាញពីនាយឧត្តមសេនីយ៍ ម៉ក់ ជីតូ អគ្គស្នងការរង ទទួលការងារប្រយុទ្ធប្រឆាំងគ្រឿងញៀន។
ចំណែកកម្លាំងសមត្ថកិច្ចជំនាញដែលចុះប្រតិបត្តិការដឹកនាំ ដោយលោកវរសេនីយ៍ឯក ស៊ី ផល្លា នាយករងមន្ទីរប្រឆាំងគ្រឿងញៀន និងលោកវរសេនីយ៍ត្រី សេង ឃុនណាង នាយការិយាល័យទី១១ ។
នាយកមន្ទីរប្រឆាំងគ្រឿងញៀនក្រសួងមហាផងមហាផ្ទៃ លោកឧត្តមសេនីយ៍ឯក ឡឹក វណ្ណៈ បានឲ្យដឹងថា កម្លាំងសមត្ថកិច្ចជំនាញនៃមន្ទីរប្រឆាំងគ្រឿងញៀនបានចុះប្រតិបត្តិការបង្ក្រាបករណីជួញដូរគ្រឿងញៀនខុសច្បាប់មួយករណី ស្ថិតនៅចំណុចខុនដូមួយកន្លែង ជាន់ទី២៩ បន្ទប់លេខ១៩ ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ កាលពីវេលាម៉ោង ៩ យប់ថ្ងៃទី២ ខែតុលា ឆ្នាំ២០១៩។
លោកឧត្តមសេនីយ៍ឯក ឡឹក វណ្ណៈ បានបន្តថា នៅក្នុងប្រតិបត្តិការបង្ក្រាបនេះ កម្លាំងសមត្ថកិច្ចចាប់ឃាត់ខ្លួនជនសង្ស័យម្នាក់ឈ្មោះ YUN LIANFU អាយុ៥១ឆ្នាំ ជាជនជាតិចិន មុខរបរមិនពិតប្រាកដ និងដកហូតវត្ថុតាងថ្នាំញៀន ចំនួន៣៩កញ្ចប់ធំ ដែលមានទម្ងន់ ៣៩ គីឡូក្រាម។
លោកបានបញ្ជាក់ថា កម្លាំងជំនាញរបស់មន្ទីរប្រឆាំងគ្រឿងញៀន បាននឹងកំពុងបន្តស្រាវជ្រាវតាមចាប់មុខសញ្ញាម្នាក់ ដែលជាម្ចាស់ថ្នាំញៀនបាននាំយកមកលក់ និងប្រគល់ឲ្យជនជាតិចិនរូបនេះ។
សូមបញ្ជាក់ថាសមត្ថកិច្ចដែលពាក់ព័ន្ធបានធ្វើការបង្ក្រាបករណីជួញដូរគ្រឿងញៀនទ្រង់ទ្រាយធំ នាំពីបរទេសចូលមកកាន់ ប្រទេសកម្ពុជា បានចាប់ខ្លួនជនសង្្ស័យដែលជាជនបរទេសយកមកផ្តន្ទាទោសតាមច្បាប់ជាបន្តបន្ទាប់ផងដែរ ។ ចំណែកជនសង្ស័យខាងលើ រួមនិងថ្នាំញៀនជិត ៤០ គីឡូក្រាម សមត្ថកិច្ចបាន និងកំពុងកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញតាមនីតិវិធី ៕